Ky vit konsiderohet më i begatshëm sa i përket sektorit të bletarisë. Krahasuar me dy vitet e kaluar, bletarët shpresojnë për një vit të mbarë. E sipas Ministrisë së Bujqësisë në Kosovë ekzistojnë rreth 200 mijë shoqëri bletësh.
Si pasojë e motit jo të mirë dhe efekteve tjera dy vitet e fundit kishte prodhimtari shumë të ultë të mjaltit, por këtë vit po ndodh e kundërta. Bletarët thonë se dallimi me vitin e kaluar është shumë i madh.
“Sivjet është një fillim shumë i mbarë. Është si vit më i rrallë. Në ato vende ku kullosa është më intensive veçse ka filluar vjelja e mjaltit dhe bletarët janë të kënaqur”, ka theksuar për RTK-në, Sylejman Zogjani, kryetar i Shoqatës së Bletarëve të Kosovës.
Ndërkaq edhe bletarët janë shprehur të kënaqur. Valon Selmani ka thënë se në vitin 2021 kanë qenë pa prodhim, po harxhimet i kanë mbuluar me subvencione, kurse këtë vit ka filluar shumë mirë.
“Bletaria është fitimprurëse jo vetëm për bletarët, prandaj sugjeroj që edhe femrat tjera të merren me bletari se është shumë profitabile”, ka theksuar bletarja Teuta Mekolli.
Ministria e Bujqësisë këtë vit ka rritur subvencionimin nga 15 në 20 euro për koshere. Zyrtarë brenda saj sqarojnë se këtë vit krahas bletarisë intensive po e mbështesin me shumë më të lartë bletarin organike.
“Për ata të cilët janë në procedurë të kovertimit në prodhimtari organike për këtë vit është planifikuar të përfitojnë edhe nga 25 euro për shoqëri të bletës”, ka theksuar Arsim Memaj nga MBPZhR.
Vendi ynë pas luftës numëronte deri 30 mijë koshere me bletë derisa sot ka deri në 190 mijë.