Rritet numri i viktimave në punë, institucionet kritikohen për mosveprim

Një tjetër punëtor humbi jetën fundjavën e kaluar në vendin e tij të punës, duke e çuar në 8 numrin e viktimave për katër muajt e parë të vitit 2025 – një rritje shqetësuese krahasuar me vitin paraprak. Sindikatat dhe ekspertët e sigurisë po kërkojnë ndërhyrje urgjente nga institucionet.

Një person humbi jetën fundjavën që lamë pas, duke u bërë viktima e 8 që mbeti i vdekur në vendin e punës gjatë katër muajve të parë të vitit 2025.

Këto shifra po shihen si shqetësuese kur krahasohen me ato të vitit paraprak, kur gjatë gjithë vitit ishin gjithsej 7 viktima në vendin e punës, sipas raportit vjetor të Inspektoratit të Punës.

Nga Sindikata e Pavarur e Sektorit Privat thonë se veprimet e institucioneve nuk kanë arritur të ndikojnë në uljen e këtyre rasteve me fatalitet.

“Si institucione shtetërore nuk jemi duke bërë asgjë për këtë, as Ministria e Punëve dhe Transfereve që po krekoset, as Inspektorati i Punës dhe as pronarët e kompanive. Vetë fakti që nuk jemi duke kushtuar kujdes të mjaftueshëm po çon deri te shifrat marramendëse të vdekjes së punëtorëve në vendin e punës. Nëse e marrim një krahasim mes Kosovës dhe vendeve përreth, në Kosovë kemi katër herë më shumë punëtorë të vdekur në vendet e punës sesa në vendet e tjera”, ka deklaruar për RTK Jusuf Azemi, kryetar i SPSK.

Rastet e tilla, sipas profesorit të inxhinierisë mekanike, Shpëtim Lajqi, ndodhin si pasojë e rrethanave të natyrave të ndryshme.

“Në rastet ku jemi të angazhuar përmes Gjykatave dhe Prokurorisë për rastet e lëndimeve në punë, edhe atyre me fatalitet, kryesisht kanë qenë punëtorë që kanë punuar dhe nuk kanë pasur kualifikimet e duhura. Pra, ka një kualifikim tjetër dhe kryen një punë tjetër. Pastaj, nuk janë të trajnuar në aspektin e sigurisë dhe mbrojtjes në punë, të cilën e kërkon ligji”, pohoi Lajqi.

Lajqi thekson se për ta zvogëluar numrin e këtyre rasteve, shteti duhet të rrisë numrin e inspektorëve që inspektojnë punimet.