Serbia mund të shfrytëzojë situatën politike në Kosovë për sulm në veri? Ja çka thotë ish- ushtaraku

LVV-ja, që ka fituar 48 ulëse në Kuvendin e Kosovës, e ka pranuar se nuk mund ta formojë Qeverinë e re të Kosovës pa bashkëpunim me një nga partitë shqiptare të përfaqësuara në Kuvend.

Partia e Kurtit nuk i ka të sigurta as 10 votat nga komunitetet joserbe, që tradicionalisht e kanë mbështetur koalicionin qeverisës, ndonëse shumica nga këto parti kanë thënë se do ta votonin një ekzekutiv të udhëhequr nga ai.

dërkaq, nga 10 vendet e tjera të rezervuara për komunitetin serb, nëntë janë fituar nga Lista Serbe dhe një nga partia e ministrit në detyrë për Komunitete dhe Kthim, Nenad Rashiq.

Deri më tani ende nuk dihet se me kë do t’i sigurojë votat për formimin e qeverisë së re, por ish- ushtaraku Hafir Hoxha, konsideron se që nga tani qeveria nuk do të jetë e qëndrueshme.

Sipas tij, problemet e qeverisë priten të paraqiten edhe në momentin kur duhet të zgjidhet presidenti-tja e Kosovës.

“Në takimin e 15 prillit, edhe nëse arrihet të formohet Qeveria, ajo me gjasë nuk do të jetë e qëndrueshme dhe e fuqishme siç ishte Qeveria në mandatin që po përfundon. Problemet pritet të paraqiten edhe në momentin kur duhet të zgjidhet Presidenti/Presidentja e Kosovës, ndaj ekziston mundësia që zgjedhjet të përsëriten gjatë vitit 2025”, shprehet Hoxha.

I pyetur nëse Serbia mund ta shfrytëzojë këtë situatë që të krijojë ndonjë sulm në veri të vendit, Hoxha thotë se ajo është e ndarë në dy grupe.

Sipas tij, në këtë moment mund të ketë ndikim më të vogël në politikën e brendshme të Kosovës.

Ndërkohë, Serbia po përballet me probleme të rënda të brendshme dhe nuk ka kapacitete të mjaftueshme për t’u marrë me zhvillimet në Kosovë. Përveç kësaj, edhe pakica serbe në Kosovë ka filluar të thyejë “disiplinën” e Vuçiqit. Ajo tashmë është e ndarë në dy grupe: grupi i parë përkrah studentët protestues në Serbi dhe është kritik ndaj përfaqësuesve politikë të serbëve në Kosovë që janë besnikë ndaj Vuçiqit. Ndërsa grupi i dytë vazhdon të mbështesë politikën e Vuçiqit në Kosovë – rreth 200 pjesëtarë të këtij grupi janë nisur në këmbë drejt Beogradit për të marrë pjesë në protestat e së shtunës, më 12 prill 2025.

Prandaj, mendoj se tani është momenti kur Serbia ka ndikimin më të vogël në politikën e brendshme të Kosovës.

Sa i përket çështjes së sigurisë, ajo është e qëndrueshme, për vetë faktin se grupet kriminale të instrumentalizuara nga Vuçiqi janë dobësuar ndjeshëm”, përfundon ish- ushtaraku.

Kujtojmë se tashmë është zbardhur edhe agjenda e 15 prillit.

Kryetari në detyrë, Glauk Konjufca ka thënë se Pikë e parë e rendit të ditës do të jetë formimi i Komisionit të përkohshëm për verifikimin e kuorumit dhe të mandateve të deputetëve, për të vijuar me betimin e deputetëve. Në vijim do të procedohet me zgjedhjen e Kryetarit të Kuvendit dhe më pas të nënkryetarëve.

“Seanca do të drejtohet nga deputeti më i vjetër, Avni Dehari (LVV) dhe deputetja më e re, Sala Jashari (PDK). Para përfaqësuesve të subjekteve politike që kanë fituar vende në Kuvend kryetari Konjufca prezantoi edhe agjendën e regjistrimit të deputetëve, si procedurë standarde para seancës konstituive”.

“Kështu, të enjten, më 10 prill, nga ora 9:00 – 16:00 do të regjistrohen deputetët nga radhët e Lëvizjes Vetëvendosje, të premten, më 11 prill deputetët nga radhët e Partisë Demokratike të Kosovës dhe të Lidhjes Demokratike të Kosovës, ndërsa të hënën, më 14 prill, deputetët nga radhët e Aleancës për Ardhmërinë e Kosovës dhe të komuniteteve pakicë, në intervalin e njëjtë kohor”, thuhet në njoftimin e kuvendit.

Me vendim të presidentes Vjosa Osmani seanca konstituive do të mbahet të martën, më 15 prill 2025, në orën 10:00.