Vjen reagimi nga VV pasi LDK dorëzoi 17 kallëzime penale ndaj tyre

Lidhja Demokratike e Kosovës ka dorëzuar në Prokurorinë Speciale sot 17 kallëzime penale ndaj kryeministrit Albin Kurti dhe ish-ministrave të kabinetit të tij.

Ministri në detyrë i Kulturës, Rinisë dhe Sportit, Hajrulla Çeku, reagoi ndaj kallëzimit penal duke e quajtur këtë veprim absurd dhe pa asnjë bazë ligjore.

Sipas Çekut, LDK-ja po bën një interpretim të gabuar të situatës kushtetuese dhe të mandatit të qeverisë në detyrë, duke kërkuar dorëheqjen e kryeministrit dhe zëvendësimin e tij me një ministër.

“Nuk ka telashe, sepse nuk ka bazë. Domethënë, nuk ka gjë më absurde sesa kjo kërkesa e Lidhjes Demokratike. Po i thonë kryeministrit lëshoje zyrën, sepse je betu tash si deputet, por kur po e pyesim ne kush duhet me e udhëheqë ekzekutivin derisa të bëhet qeveria e re, nuk dinë me dhënë përgjigje. Me i thënë kryeministrit ti largohu, e këta le të vazhdojnë me punu do zëvendësa aty, s’ka kurrfarë kuptimi, sepse kryeministri është Qeveria,” tha Çeku.

Ai sqaroi se ministrat aktualë janë ende në detyrë, pasi janë emëruar nga legjislatura e kaluar dhe mbesin në pozita derisa të formohet qeveria e re.

“Na jemi ministrat e Legjislaturës së tetë dhe deputetë të Legjislaturës së nëntë. Kur jam zgjedhë ministër, më ka përfundu mandati i deputetit, jam ministër. Sot jam në detyrë, kujdestaroj derisa të jem ministër i Legjislaturës së Nëntë. Është krejt e palogjikshme, por sidomos ditëve të fundit kemi parë qëndrime, deklarata dhe veprime të pamençura që po i bën Lidhja Demokratike në këtë situatë,” deklaroi Çeku.