A do t’i japë votat PDK për ta çuar në Kushtetuese “ngërçin”, Krasniqi: E shqyrtojmë, pastaj komunikoj me AAK’në

Kreu i PDK-së, Memli Krasniqi, u pyet nëse partia e tij do t’i japë nënshkrimet për ta dërguar në Kushtetuese vendimet e Kuvendit siç propozoi kreu i AAK-së, Ramush Haradinaj.

“Nuk e kam parë ende lëndën. Sapo u njoftova. Sa i përket dërgimit të rasteve të caktuara në Kushtetuese, i kemi dërguar 11 dhe  kemi fituar 1. Pra, kemi ekspertizën e duhur për të vlerësuar a duhet të dërgohet diçka. Do ta shqyrtojmë pa paragjykim dhe do të marrë mendimin e ekspertëve të PDK-së pastaj do të komunikoj edhe me kolegët edhe nga AAK”, tha Krasniqi.

Para seancës, Haradinaj tha se do t’i drejtohen Gjykatës Kushtetuese për vlerësim të vendimeve të Kuvendit të Kosovës dhe situatës që është krijuar.

Për këtë duhet të jenë së paku 10 deputetë dhe Haradinaj tha se për këtë po konsultohet me dy partitë tjera, PDK dhe LDK.

 

“Ne veçse e kemi përgatitur një kërkesë për vlerësim. Do t’i drejtohemi Gjykatës Kushtetuese me kërkesë për vlerësim të kushtetutshmërisë të vendimeve që janë marrë në Kuvend. Si rasti i mosformimit të Komisionit për votimin e fshehtë dhe të gjitha vendimet paraprake bazuar në procesverbalin e seancave. Sot jemi në konsulta edhe me PDK-në dhe LDK-në në mënyrë që 10 deputetë t’i drejtohemi Gjykatës. Të gjitha vendimet e Kuvendit veç e veç si për mënyrën e votimit, për ndërprerjen, si për situatën e mosnxjerrjes në votim të kandidatit, ardhja në seancë e të gjitha këto”.