Barcelona, kampione e re e La Ligas, dominim i katalunasve në Spanjë

Trofeut të Superkupës dhe Kupës së Mbretit, Barcelona i shtoj edhe titullin e kampionit, të cilin e konfirmoj të enjten mbrëma në derbin me rivalin e qytetit, Espanyol.

Përballë ekipit tjetër nga Barcelona, katalunasit shënuan fitore me rezultat 0:2, e mjaftueshme për të mbajtur në distancë Real Madridin prej 8 pikëve, kur janë edhe dy duele deri në fund të La Ligas.

Lamine Yamal zhbllokoi sfidën me një supergol në minutën e 53-të, që ishte i teti në këtë sezon. Fermin Lopez, në minutën e pestë shtesë dyfishoj avantazhin për ta vulosur fituesin.

Te Espanyol luajti Marash Kumbulla, derisa vendësit mbetën me një lojtar më pak kur Cabrera u ndëshkua direkt me të kuq pasi goditi Yamalin, veprim që u rishikua nga VAR.

Barça ka 85 pikë pas 36 ndeshjeve, duke dominuar ndaj rivalit të përhershëm Real Madridit, të cilin e mposhti të dielën në “El Clasicon” e fundit të sezonit, 4:3.

Në fakt, skuadra e Hansi Flickut ka fituar katër ndeshjet e këtij sezoni në të gjitha garat ndaj “Los blancos”, duke fituar tre trofetë në Spanjë.

Ky është titulli i 28-të i kampionit për Barcelonën dhe i pari që nga viti 2023, duke e shfronësuar Real Madridin, që sezonin e kaluar e fitoi titullin e 36-të në histori të klubit.

Flick transformoi ekipin blaugrana, duke krijuar një ekip me të rinjtë si Yamal, Cubarsi, Pedri, të ndihmuar edhe nga Raphinha, Lewandowski, Kounde e Sczeszny, të cilët rikthyen trofetë në klub.