Kryeministri spanjoll thirrje që Izraeli të përjashtohet nga Eurovizioni dhe garat ndërkombëtare

Kryeministri spanjoll Pedro Sanchez bëri thirrje për përjashtimin e Izraelit nga Eurovizioni dhe garat ndërkombëtare, duke bërë një paralele me përgjigjen ndaj luftës së Rusisë kundër Ukrainës dhe duke theksuar nevojën për qëndrueshmëri në mbrojtjen e të drejtave të njeriut dhe të drejtës ndërkombëtare, transmeton Anadolu.

“Angazhimi i Spanjës ndaj të drejtës ndërkombëtare dhe të drejtave të njeriut duhet të jetë i vazhdueshëm dhe duhet të jetë gjithashtu i qëndrueshëm në Evropë”, tha Sanchez gjatë prezantimit të një raporti mbi sektorët kulturorë dhe krijues të Spanjës.

Duke kujtuar se si Rusia u përjashtua shpejt nga platformat globale si garat sportive dhe muzikore, Sanchez sugjeroi që i njëjti standard duhet të zbatohet edhe për Izraelin, veçanërisht për shkak të luftës së saj në Gaza.

“Kjo është arsyeja pse besoj se askush nuk u trondit kur pushtimi i Ukrainës nga Rusia filloi tre vjet më parë dhe u kërkua që ajo të hiqej nga … garat ndërkombëtare dhe gjithashtu të mos merrte pjesë, për shembull, e kemi parë së fundmi fundjavën e kaluar, në Eurovizion”, tha ai.

“Prandaj, as Izraeli nuk duhet, sepse ajo që nuk mund të lejojmë janë standardet e dyfishta, as në kulturë”, shtoi ai.

Sanchez përfundoi me një mesazh solidariteti për popullin e Palestinës që po “përjeton padrejtësinë e luftës dhe bombardimeve”.