“Pse OVL frikësohet nga zbardhja e së vërtetës?”/ Osman Ferizi shpërthen: Kush i dha listat për ekzekutim?

Organizata e Veteranëve të Luftës së Ushtrisë Çlirimtare të Kosovës (OVL-UÇK), para disa ditësh i ka dërguar letër përfaqësuesit të presidentit amerikan Donald Trump për misione speciale, Richard Grenell, duke kërkuar mbylljen e Gjykatës Speciale.

Por ndaj kësaj letre të OVL-së ka reaguar ashpër veprimtari dhe ish-pjesëtari i grupit të armatosur të dhjetorit 1991, Osman Ferizi.

“Pengjet e drejtësisë – PDK-ja dhe SHIK-u”. “Drejtësia nuk mund të jetë selektive – ajo ose është drejtësi, ose farsë. Letra e OVL-UÇK-së drejtuar ambasadorit Grenell ngre pyetje serioze: A kërkohet drejtësi apo amnisti për të akuzuarit? A synohet zbardhja e së vërtetës apo zhdukja e saj? Gjykata Speciale është themeluar me votat e Kuvendit të Kosovës, nën presionin ndërkombëtar, si një mjet për të adresuar pretendimet për krime lufte dhe pas lufte – përfshirë vrasjet politike, që mbeten plagë të hapura në shoqërinë tonë,” deklaron Ferizi.

Sipas tij, faktet e njohura deri më tani janë të mjaftueshme për të mos heshtur.

“Vrasjet sistematike të veprimtarëve institucionalë të LDK-së. Listat për likuidime fizike të publikuara në ‘Zërin e Kosovës’. Fushatat e mbushura me thirrje për hakmarrje nga PDK-ja dhe AAK-ja. Familje të shkatërruara, fëmijë që u rritën pa prindër, gra pa bashkëshortë, motra pa vëllezër. Heshtje dhe frikë për dekada me radhë. Nëse këto nuk zgjidhen në mënyrë të paanshme e të drejtë, atëherë drejtësia do të dështojë. E dështuar, drejtësia e shtyn shoqërinë drejt vetëgjyqësisë, hakmarrjes dhe kaosit,” thekson Ferizi.

Osman Ferizi

Ai vazhdon me kritika të ashpra ndaj qëndrimit të OVL-së.

“Pse OVL-UÇK kërkon ndërhyrjen e Richard Grenell? Pse frikësohet nga zbardhja e së vërtetës? A po e pengon drejtësia kur ajo prek rrethin e tyre politik apo ushtarak? Është e padrejtë të kërkohet që drejtësia të ndalet kur fillon të afrohet me të vërtetën. Nuk mund të ketë shtet ligjor me drejtësi të ndarë në ‘tanët’ dhe ‘atyret’,” shton Ferizi.

Më tej, Ferizi thotë se nëse nuk zbardhen vrasjet politike, atëherë Gjykata Speciale ka dështuar në misionin e saj.

“Nëse Gjykata Speciale dështon të hetojë vrasjet politike, atëherë ajo e ka humbur legjitimitetin dhe misionin për të cilin është krijuar. Por nëse ajo guxon t’i shkojë deri në fund këtyre krimeve, shoqëria jonë më në fund mund të marrë frymë lirshëm – jo për hakmarrje, por për drejtësi. Sepse drejtësia për viktimat nuk është kërkesë politike, por detyrim moral dhe njerëzor. Drejtësia nuk është hakmarrje – është paqe për ata që nuk jetojnë më. Kush i vrau veprimtarët institucionalë? Kush i dha listat për ekzekutim? Kush heshti kur fëmijët mbetën pa prindër e gratë pa burra?”, përfundon veprimtari dhe ish-pjesëtari i grupit të armatosur të dhjetorit 1991, Osman Ferizi.

“Po ju shkruajmë nga Organizata e Veteranëve të Ushtrisë Çlirimtare të Kosovës (OVL-UÇK), për të shprehur shqetësimin tonë të thellë dhe në rritje se Dhomat e Specializuara të Kosovës e kanë humbur qëllimin e tyre. Ajo që duhej të ishte një gjykatë drejtësie është shndërruar në një armë politike. Dhe administrata juaj, më shumë se kushdo tjetër, e di se çfarë ndodh kur drejtësia bëhet politike – ajo kthehet në represion. I nderuar Ambasador, po ju drejtohemi jo si politikanë, por si veteranë, drejtuar një veterani tjetër – vëllezër të armës, mbrojtës të lirisë. Po ju kërkojmë të ngrini këtë çështje në administratën tuaj. Tatimpaguesit amerikanë nuk i kanë dërguar paratë e tyre të fituara me djersë në Evropë për të financuar një gjykatë që shkel vlerat mbi të cilat është ndërtuar Amerika. Presidenti Trump po rishkruan rregullat e vjetruara të kontrollit politik ndaj drejtësisë së pavarur dhe, sipas këtyre rregullave të reja, kjo gjykatë duhet të mbyllet. Ajo është një turp për drejtësinë amerikane dhe për vlerat amerikane”, thuhet ndër të tjera në letrën e OVL-së drejtuar Richard Grenellit.