Marrëveshja ushtarake Kosovë – SHBA/ Flet eksperti i sigurisë: Ja pse ky pakt është ndryshe!

Forca e Sigurisë së Kosovës (FSK) dhe Departamenti amerikan i Mbrojtjes kanë nënshkruar Marrëveshjen për Ndërveprueshmëri dhe Siguri në Komunikim (CISMOA) një dokument kyç që mundëson shkëmbim të sigurt të informacionit dhe rritjen e ndërveprueshmërisë mes dy forcave.

Marrëveshja u firmos në Prishtinë nga Komandanti i FSK-së, Gjenerallejtënant Bashkim Jashari, dhe Gjeneral Major John Phillips, Drejtor i Komunikimit dhe Kibernetikës në Komandën Evropiane të SHBA-së (EUCOM).

Ambasada amerikane në Prishtinë e cilësoi këtë marrëveshje si një hap të madh përpara në forcimin e bashkëpunimit dypalësh.

E në lidhje me këtë temë në një prononcim për “Bota sot”, ka folur eksperti i sigurisë, Fatjon Softa.

Ai thotë se marrëveshja mes Kosovës dhe SHBA është një hap i rëndësishëm në thellimin e marrëdhënieve ushtarake mes dy vendeve.

 

Sipas tij, kjo marrëveshje mundëson shkëmbim të sigurt të informacionit ushtarak dhe teknik mes FSK dhe forcave amerikane.

“Marrëveshja për Ndërveprueshmëri dhe Siguri në Komunikim (CISMOA) e nënshkruar mes Forcës së Sigurisë së Kosovës (FSK) dhe Departamentit amerikan të Mbrojtjes përfaqëson një hap të rëndësishëm në thellimin e marrëdhënieve ushtarake mes Kosovës dhe SHBA.

Kjo marrëveshje mundëson shkëmbim të sigurt të informacionit ushtarak dhe teknik midis FSK-së dhe forcave amerikane, duke përdorur sisteme të avancuara dhe të mbrojtura të komunikimit.

Kjo do te rris bashkëpunimin operacional, me forcat e NATO-s dhe SHBA-së në misione të përbashkëta.

Hap rrugë për pajisjen me teknologji dhe trajnim te avancuar të FSK-së në përputhje me standardet e NATO-s”, shpjegon eksperti.

Eksperti i sigurisë tutje shton që kjo marrëveshje është sinjal i qartë që SHBA e sheh Kosovën si një partner të rëndësishëm dhe e vendos të njëjtën më afër standardeve të aleancës së NATO-s.

“CISMOA është një nga katër marrëveshjet kyçe që SHBA nënshkruan me aleatët dhe partnerët e saj më të ngushtë, dhe fakti që Kosova është përfshirë në këtë nivel e konfirmon mbështetjen strategjike të SHBA-së për zhvillimin dhe profesionalizimin e FSK-së.

Ky është një sinjal i qartë politik dhe diplomatik se SHBA e sheh Kosovën si një partner të rëndësishëm për sigurinë dhe stabilitetin në Ballkanin Perëndimor.

Kjo e vendos Kosovën më afër standardeve të aleancës së NATO-s, dhe e forcon pozitën e saj si një vend që kontribuon për sigurinë rajonale.

Kjo rrit besueshmërinë e shtetit të Kosovës në arenën ndërkombëtare, sidomos ndaj vendeve që janë skeptike për statusin e saj”, përfundoi eksperti i sigurisë Fatjon Softa