Ish-pjesëtari i Njësisë Speciale po merret në pyetje nga prokuroria serbe, Koci: Duhet të lirohet menjëherë

Arbnor Spahiu, ish-pjesëtar i Njësisë Speciale Operative të Policisë së Kosovës, i cili u ndalua të dielën nga autoritetet serbe në pikën kufitare në Horgosh, është duke u marr në pyetje nga Prokuroria serbe në Suboticë.

Lajmin për Telegrafin e ka konfirmuar avokati, Arianit Koci duke treguar po ashtu se dje ka qenë në Serbi.

Sipas tij, ligjërisht, prokurori e ka mundësinë që pas marrjes në pyetje ta lirojë pa asnjë masë.

“Dhe kjo është zgjidhja e vetme që do të ishte në përputhje me drejtësinë. Por duke i ditur qëndrimet e vazhdueshme të Serbisë ndaj Kosovës – përfshirë frikësimet sistematike ndaj policëve, aktivistëve dhe disa qytetarëve tanë – ekziston rreziku që të kërkohet paraburgimi. Kjo nuk do të ishte drejtësi – por përndjekje politike”, ka thënë avokati.

Tutje ai tha se është i bindur se kjo çështje do të përfundojë në favor të Arbnorit.

“Sepse drejtësia – kur nuk përdoret si armë politike – e njeh të vërtetën”, tha ndër të tjera Koci.

Ndryshe, Arbnor Spahiu, ish-pjesëtar i Njësisë Speciale Operative të Policisë së Kosovës, është ndaluar më 7 qershor në pikën kufitare Horgosh nga autoritetet serbe. Pas ndalimit në Horgosh ai është dërguar në qendrën e ndalimit në Kanjizë.