Dy vajza, dy podiume, një ekip që vazhdon të na bëjë krenarë

Kryeministri në detyrë i Kosovës, Albin Kurti i ka uruar xhudsitet tona për suksesin e arritur në Kampionatin Botëror të Budapestit.

Distria Krasniqi fitojë medaljen e argjendtë, derisa Laura Fazliu u stolis me të bronztën në këtë event të madh të xhudos.

Kurti përmes rrjeteve sociale, ka thënë se Kosova e mbylli këtë kampionat me sukses duke e çuar në 10 numrin total të medaljeve botërore.

“Pas suksesit të Distria Krasniqit me medaljen e argjendtë, Laura Fazliu siguroi edhe një medalje për Kosovën në Kampionatin Botëror të Xhudos. Kjo është medalja e dytë botërore e Laurës. Me qetësi dhe vendosmëri, ajo u ngjit sërish në podiumin e shkëlqimit, duke dëshmuar vazhdimësinë dhe forcën e kampionëve tanë. Me këto dy medalje, një të argjendtë dhe një të bronztë, Kosova e mbyll këtë kampionat me sukses dhe e çon në 10 numrin total të medaljeve botërore, dyfishi i atyre olimpike.

Urime Laurës, Distrias, trajnerit Driton Kuka, Federatës së Xhudos dhe tërë komunitetit sportiv!”, ka shkruar Kurti.