Kurti e Nagavci vendosën gurthemelin e shkollës në Fushë Kosovë

Kryeministri në detyrë, Albin Kurti, e ministrja në detyrë e Arsimit, Arbërie Nagavci, kanë marr pjesë në ceremoninë e inaugurimit të çerdhes dhe vënies së gurthemelit të shkollës së re në Fushë Kosovë.

Kurti ka thënë se investitor është MASHTI, derisa vlera e projektit për ndërtimin e shkollës së re është rreth 3.9 milionë euro.

Kreu në detyrë i qeverisë ka folur për strukturën e shkollës që tha sedo t’i ketë 12 klasë të mësimit fillor, 6 klasë të mësimit parashkollor e 7 laboratorë me hapësira përcjellëse e zyra administrative.

“Sipërfaqja është 8 mijë e 213 metra katror, kapaciteti për fëmijë është deri në 1 mijë e 500 nxënës nëse është me dy ndërrime dhe afati i ndërtimit është 36 muaj apo 3 vjet. Investimet në total në Fushë Kosovë në fushën e arsimit gjatë këtij mandatit tonë ishin mbi 5.6 milionë euro” ,tha Kurti.

Ndërkaq, ministrja në detyrë e arsimit, Arbërie Nagavci tha se, Fushë Kosova deri vonë ka qenë një nga vendet e pakta që ka mbajtur mësim me tri ndërrime e orë të shkurtuara.

“Banorët këtu e dinë me sa shumë sfida janë përballur deri më tani e Fushë Kosova deri vonë ka qenë ndër pak vende që ka pasur mësimin në tri ndërrimi me orë tejet të shkurtuara, me sfida serioze  në arritjen e objektivave. Investimet tona kanë qenë të shumëfishta krahas investimit në ndërtimin e objekteve edhe në pajisjen e  shkollave me infrastrukturën e nevojshme, por edhe në përgatitjen kuadrove të mësimdhënësve e edukatorëve që punojnë me fëmijë”, tha ajo.