Problemet e Kosovës vijnë nga marrëveshjet e së kaluarës

Kryeministri në detyrë, Albin Kurti, pas inaugurimit të çerdhes dhe vendosjes së gurthemelit të shkollës në Fushë Kosovë ka komentuar mbi procesin e konstituimit të Kuvendit dhe debatet e fundit për kryetarin e ri të Kuvendit, Dimal Basha.

Kurti theksoi se është mirë që nesër të përmbyllet konstituimi i Kuvendit, duke shtuar se ka mbetur vetëm edhe një nënkryetar për t’u zgjedhur. Ai theksoi se personi më i përshtatshëm për këtë pozitë është ministri në detyrë për Kthim dhe Komunitete, Nenad Rashiq.

“Dimal Basha është kryetar i Kuvendit i cili ende nuk është konstituuar. Shpresoj që këtë ta bëjnë nesër. Ka ngelur edhe një nënkryetar që të zgjidhet. Besoj që më së miri do të ishte që kjo punë të kryhet nesër duke e përzgjedhur aty Nenad Rashiqin, i cili e pranon Republikën e Kosovës, punon për institucionet e shtetit tonë dhe njëkohësisht është ministri i cili ka bërë më së shumti për komunitetin serb në vendin tonë”, deklaroi Kurti.

Sa i përket debatit të hapur ditëve të fundit për një publikim shkencor me bashkautorësi nga kryetari i Kuvendit, Dimal Basha, Kurti tha se kjo nuk ka asnjë lidhje me Ushtrinë Çlirimtare të Kosovës dhe se manipulimi në këtë drejtim është i pabazë.

“Kryetari i Kuvendit Dimal Basha e ka dhënë sqarimin për atë publikim që është bërë para më shumë se një dekade dhe aty e ka sqaruar që kapitulli apo kreu që e ka shkruar ai, nuk ka asgjë të bëjë me Ushtrinë Çlirimtare të Kosovës. Pra, edhe një herë, ju e keni parë fjalimin e tij pas zgjedhjes, ku ka shprehur vlerësimet më të larta për këtë vlerë të shenjtë të Kombit Shqiptar”, tha Kurti.

Ai shtoi se problemet aktuale në Kosovë nuk lidhen me këtë çështje, por me vendime dhe marrëveshje politike të së kaluarës.

“Unë besoj që problemet që i kemi sot në Kosovë, nuk i kemi nga një deformim e keqinterpretim i një artikulli me bashkautorësi, ku ky nuk është autori i atij kapitulli të para më shumë se një dekade. Problemet i kemi kur është nënshkruar ‘Zajednica’ në vitin 2013, kur janë amnistuar kriminelët serb në veri po ashtu në vitin 2013, kur është votuar Gjykata Speciale në 2015, kur është themeluar Lista Serbe në bashkëpunim me Beogradin, dhe kur janë bërë qeveri duke u varur nga Lista Serbe e pazaret për ndarjen e Kosovës, e jo tek ky artikulli ku manipulohet kreu i kuvendit, i cili nuk ka fare autorësi”, shtoi Kurt