Franca e Gjermania nisin dialog për armët bërthamore dhe për mbrojtjen

Në Toulon të Francës u mbajt sot Këshilli franko-gjerman i Sigurisë dhe Mbrojtjes, ku dy vendet njoftuan një sërë nismash të reja për forcimin e sigurisë evropiane dhe mbështetjen e Ukrainës.

Kancelari gjerman Friedrich Merz dhe presidenti francez Emmanuel Macron, së bashku me ministrat e Jashtëm dhe të Mbrojtjes, ranë dakord të nisin një dialog strategjik për frenimin bërthamor, duke e cilësuar atë si një “gur themeli i sigurisë së NATO-s”. Në deklaratën përfundimtare, të dyja vendet theksuan se forcat bërthamore të pavarura të Francës japin kontribut të madh për sigurinë e Aleancës. Macron theksoi se Franca do të mbetet e pavarur në vendimmarrjen për armët e saj bërthamore, raporton media gjermane NTV.

Një tjetër hap i rëndësishëm është ndërtimi i një sistemi të përbashkët paralajmërimi të hershëm për mbrojtjen kundërraketore, i cili do të bazohet në projektin evropian “Odin’s Eye”. Sistemi do të përfshijë mbrojtje të bazuar në hapësirë dhe radarë tokësorë, ndërsa nisma, e quajtur JEWEL, do të jetë e hapur për shtete të tjera.

Gjermania dhe Franca konfirmuan gjithashtu se do të forcojnë mbrojtjen ajrore të Ukrainës, megjithëse në deklaratë nuk përmendet projekti i ardhshëm i avionit luftarak FCAS, për të cilin ekzistojnë ende mosmarrëveshje mes dy vendeve. Palët deklaruan se do të paraqesin një plan kohor për këtë projekt deri në fund të vitit.