Hargreaves kujton Bajram Qerkinin dhe përkushtimin e Britanisë për drejtësi

“Mbretëria e Bashkuar mbetet e përkushtuar për të ndihmuar Kosovën dhe qytetarët e saj me pasojat e konfliktit të viteve 1990”. Kështu theksoi sot ambasadori britanik në Kosovë, Jonathan Hargreaves, i cili mes tjerash kujtoi të ndjerin Bajram Qerkini,udhëheqësin e Qendrës Burimore për Persona të Zhdukur.

“Ndërsa sot shënuam Ditën Ndërkombëtare të të Zhdukurve, ne kujtuam bacën Bajram—një baba që kurrë nuk ndali së kërkuari për djalin e tij të zhdukur, dhe që u bë zëri i familjeve në mbarë Kosovën dhe më gjerë”, shkroi Hargreaves.

Ai shtoi se trashëgimia e Bajram Qerkinit duhet të vazhdojë. “Diskutuam për nevojën që të gjithë ne të vazhdojmë trashëgiminë e tij—të rrisim vetëdijen, të hapim dyer dhe të inkurajojmë institucionet në Kosovë dhe Serbi të punojnë së bashku për të hequr pengesat që ndalojnë njohjen e së vërtetës.”

Ambasadori gjithashtu theksoi përkushtimin e Britanisë së Madhe ndaj përballimit të së kaluarës.

“Mbretëria e Bashkuar mbetet e përkushtuar për të ndihmuar Kosovën dhe të gjithë qytetarët e saj me pasojat e konfliktit të viteve 1990, sepse ne e njohim se përballimi i së kaluarës është thelbësor për ndërtimin e një të ardhmeje sa më të mirë”, theksoi diplomati britanik.

Ai falënderoi gjithashtu UNDP-në, institucionet e Kosovës dhe të gjithë partnerët lokalë për përpjekjet e vazhdueshme drejt aksesit në drejtësi, përkujtimit gjithëpërfshirës dhe sigurimit që të gjithë së bashku punojnë për një të ardhme paqësore për të gjithë.