Nesër tentimi i 60-të në Kuvend, a ka ardhur koha t’i jepet fund ngërçit?

Një ditë para tentimit të 60-të për bërjen e Kuvendit, presidentja, Vjosa Osmani, u kërkoi partive parlamentare të për të themeluar Kuvendin dhe Qeverinë, sa më parë. E kryeministri në detyrë shpreson që çështjen e nënkryetarit të Kuvendit ta zgjidhin nesër.

“Kuvendi të konstituohet urgjentisht, po ashtu qeveria të zgjidhet urgjentisht. Çdo ditë e humbur është ditë e humbur për Kosovën, për popullin e saj, për perspektivën tonë euroatlantike, kështu që shpresoj që të gjendet një zgjidhje në përputhje me Kushtetutën sa më parë që të jetë e mundur”, ka thënë presidentja Osmani.

Votimi ndaras për nënkryetarët u bë shkak për mospajtime në parlament dhe ngërçin e radhës, të cilin kryeministri në detyrë shpreson ta zgjidhin nesër.

“Besoj që më së miri do të ishte që të kryhet kjo punë nesër duke e përzgjedhur aty Nenad Rashiqin i cili e pranon Republikën e Kosovës, punon për institucionet e shtetit tonë dhe njëkohësisht është ministri i cili ka bërë më së shumti për komunitetin serb në vendin tonë”, ka thënë Kurti.

E këtij të fundit, në zyrë tashmë i ka shkuar një letër nga zyrtarët e Bashkimit Evropian, ku i bëhet me dije të njëjtit nuk do të zhvillojnë takime brenda ndërtesës së Qeverisë së Kosovës derisa vendi të ketë një ekzekutiv me mandat të plotë.

“Në përputhje me këtë aktgjykim dhe në interes të qëndrueshmërisë institucionale dhe respektimit të sundimit të ligjit, vizitorët e nivelit të lartë nga shtetet anëtare të BE-së dhe institucionet e BE-së do të përmbahen, përkohësisht, nga mbajtja e takimeve me kryeministrin në detyrë dhe ministrat brenda ndërtesës së Qeverisë së Kosovës, derisa të vijë një qeveri me mandat të plotë”, ka thënë Ambasadori i Bashkimit Evropian në Kosovë, Aivo Orav.

Letra që tregoi se Bashkimi Evropian do të shmangë takimet në ndërtesën qeveritare, nxiti reagime të shumta me kritika ndaj kryeministrit në detyrë.

E zëdhënësi i Qeverisë, Përparim Kryeziu, ka deklaruar se takimet me kryeministrin në detyrë Albin Kurti duhet të zhvillohen në ambientet e Kryeministrisë, pasi aty është vendi i punës së tij.

“Kushdo që kërkon takim me kryeministrin në detyrë të Republikës së Kosovës, duhet të vijë në vendin ku punon kryeministri në detyrë i Republikës së Kosovës, gjithsesi kjo nuk do të thotë që nuk mban takime pune edhe jashtë zyrës së tij, por për këtë duhet të ketë dakordim të palëve”, ka thënë Përparim Kryeziu – Zëdhënës i Qeverisë në detyrë.

Për një njohës politik, kjo letër është sinjal për Kurtin se ka ardhur koha për t’i dhënë fund bllokadës.

“Kur evropianët e kanë parë që klasa politike sikur nuk po i ngutet për këtë ngërçin dhe është ideja që të bëhet pak presion që të dilet nga kjo statusko dhe të krijohen institucionet me kompetenca të plota për shkak se BE-ja e ka çështjen e dialogut, ka shumë çështje që janë për rajonin edhe janë shumë zhvillime edhe ndërkombëtare, ata dëshirojnë ta kenë një partner që ka legjitimitet nga një legjislaturë e re”, ka thënë Sylë Ukshini – njohës politik./rtk