Qeveria ka ndërmarrë hapa për të përkrahur fuqizimin e grave

Gjatë Konferencës Rajonale “Fuqizimi i Grave në Ballkanin Perëndimor”, kryeministri në detyrë, Albin Kurti, tha se qeveria ka ndërmarrë hapa për të përkrahur gratë dhe fuqizimin e tyre në sektorin e bujqësisë.

“Qeveria ka ndërmarrë hapa konkretë duke mbështetur bujqësinë e udhëhequr nga gratë dhe duke zgjeruar programet për zhvillim ekonomik e social në zonat rurale. 5,650 gra fermere janë përkrahur me subvencione në vlerë prej 11 milionë eurosh nga Ministria e Bujqësisë. Po zbatohet një program strategjik prej 1.5 milionë eurosh, i cili përmes trajnimeve të avancuara në agro-biznes, menaxhim të tokës dhe zhvillim të qëndrueshëm, synon që gratë rurale të bëhen lidere të bizneseve dhe inovacioneve rurale,” tha ai.

Mbahet konferenca rajonale ‘Fuqizimi i Grave në Ballkanin Perëndimor’

Në Prishtinë është mbajtur Konferenca Rajonale “Fuqizimi i Grave në Ballkanin Perëndimor”, e organizuar nga Shoqata EkoKos Women, e cila synon të adresojë sfidat dhe mundësitë në fushën e fuqizimit social dhe ekonomik të grave rurale në rajon.

Koordinatorja nacionale e platformës për Kosovë, Magbule Hyseni, tha se edhe pse gratë rurale në Kosovë përballen me sfida, ato mbeten shtylla e shoqërisë dhe zhvillimit ekonomik të vendit.

“Gratë rurale në Ballkanin Perëndimor përballen me sfida të përbashkëta si qasje e kufizuar në tokë, resurse financiare, tregje dhe vendimmarrje. Megjithatë, ato mbeten shtylla kryesore e shoqërisë dhe komuniteteve tona, ushqejnë familjet, mbajnë gjallë ekonominë rurale dhe ruajnë traditat e trashëgiminë kulturore. Përmes kësaj platforme, kemi krijuar një hapësirë unike bashkëpunimi ku zërat e grave nga Kosova, Shqipëria, Maqedonia e Veriut, Mali i Zi, Serbia dhe Bosnja e Hercegovina bëhen më të fuqishëm së bashku,” theksoi ajo.

Sekretarja e Përgjithshme në Ministrinë e Bujqësisë, Venera Çerkini, tha se mbështetja e grave rurale mbetet prioritet i ministrisë së Bujqësisë. “Kemi krijuar politika të qarta dhe mbështetje konkrete për gratë rurale. Janë vendosur një sërë mekanizmash mbështetës që u japin grave më shumë mundësi për investim, ngritje të kapaciteteve profesionale dhe përfshirje në zinxhirin e vlerës bujqësore”, ka thënë Çerkini.

Koordinatorja rajonale e platformës, Biljana Petrovska Mitrevska, prezantoi platformën rajonale për përmirësimin e statusit ekonomik dhe social të grave rurale në Ballkanin Perëndimor. “Platforma synon promovimin e barazisë gjinore, avancimin ekonomik të grave dhe rritjen e pjesëmarrjes së tyre në vendimmarrje. Vizioni ynë mbetet bashkimi dhe fuqizimi i grave rurale, ndërsa si strategji përfshihet lobimi dhe barazia gjinore,” shtoi ajo.