Djathi zviceran Gruyère nga Neuchâtel shpallet më i miri në botë

Djathi zviceran Gruyère, i prodhuar në kantonin Neuchâtel, është shpallur djathi më i mirë në botë këtë javë në një konkurs ndërkombëtar të mbajtur në Tours, Francë. Fituesi, që punon në fshatin e vogël La Côte-aux-Fées, e priti këtë lajm me gëzim të madh.

Në qumështoren e tij, Simon Miguet ende e ka të vështirë ta besojë. Lajmin e mori të martën, gjatë turnit të mëngjesit. “Sapo kisha mbaruar procesin e prodhimit, pompa e parë ishte gati. Ndala për pesë minuta për një kafe dhe aty mora mesazhin,” tregon ai, duke përshkruar një ndjesi të fortë krenarie.

Djathi i tij Gruyère AOP – një djathë i fortë e i tharë, i bërë nga qumësht i papërpunuar dhe i vjetëruar për më shumë se 12 muaj – fitoi çmimin e parë në Mondial du Fromage në Tours, duke mposhtur pothuajse 1,900 produkte nga e gjithë bota, transmeton albinfo.ch.

Ky prodhues 34-vjeçar mori në dorë biznesin e tij në La Côte-aux-Fées vetëm dy vite më parë. Për të, medalja është fryt i një pune të kujdesshme e të përditshme: “Nuk ka sekrete magjike, sidomos kur punon me qumësht të papërpunuar. Duhet monitorim i vazhdueshëm – pastrim, kujdes, lëvizja e djathrave, ndërrimi i dërrasave. Është punë çdo ditë, shtatë ditë në javë, 365 ditë në vit.”

Në një intervistë për emisionin Forum, Miguet shpjegoi shijet e këtij djathi: “Ky ishte një Gruyère AOP i vjetëruar 12 muaj, ku fillonin të formoheshin kristalet e kripës, me një nuancë të lehtë të kripur dhe një aromë të pasur e intensive.”

Ai shtoi se edhe pse Gruyère mund të vjetërohet deri në 16–18 muaj, për të, shija më e mirë arrihet pas një viti.

Fitore me jehonë ndërkombëtare

Krahas tij, edhe rafinuesi i djathit Anthony Margot ndau entuziazmin e kësaj fitoreje, e cila solli menjëherë interes të madh. “Më shumë telefonata, urime, shumë klientë nga Franca për shkak të jehonës atje, por gjithashtu edhe nga Shtetet e Bashkuara dhe vende jashtë BE-së,” tha ai.

Ky sukses vjen në një kohë të ndjeshme për industrinë, të goditur nga tarifat e reja amerikane. “Nëse mund t’i rrisim shitjet, do ta bëjmë me dëshirë. Jemi nën presion nga të gjitha anët dhe tregtia ndërkombëtare nuk është e lehtë,” shtoi ai.

Edhe vetë Miguet shprehu të njëjtën shpresë: “Është një lajm i mirë për gjithë industrinë e Gruyère AOP që të njihet e të shpërblehet me këtë titull. Shpresoj të sjellë më shumë vëmendje ndërkombëtare dhe që njerëzit të konsumojnë më shumë Gruyère AOP.”