Policia konfiskon si prova materiale posterët e Vuçiqit që u vendosën në veri

Policia e Kosovës përmes raportit 24 orësh ka dhënë detaje lidhur me vendosjen e posterëve me fotografinë e presidentit serb Aleksandar Vuçiq, në veri të Kosovës.

Policia bënë të ditur se posterat janë larguar nga vendet ku ishin vendosur dhe të njëjtit janë marrë si prova materiale.

“Është raportuar se persona të panjohur nëpër mure të ndërtesave kanë vendosur pamflete me mbishkrime. Pamfletet janë tërhequr nga vendet ku janë vendosur si provë materiale. Rasti nën hetime”, ka njoftuar policia.

Përveç fotografisë së Vuçiqit në to shkruhej edhe mesazhi “Komandant Suprem, ju presim”.

Lidhur me këtë rast reagoi edhe ministri i Brendshëm, Xhelal Sveçla i cili parlajmëroi se se nëse Vuçiqi është nisur drejt Kosovës pa leje përkatëse, do të arrestohet.

“I paskan ngjitur tinëz gjatë natës disa postera në veri të Kosovës. Aty thonë që po e presin presidentin e Serbisë të vijë duke e quajtur atë ‘komandant’. Nëse është nisur pa kërkesë te Ministria jonë e Punëve të Jashtme dhe Diasporës, edhe ne po e presim të vijë dhe mandej mund ta vizitoni në burg, ku ai i ka tashmë disa miq të tij”, ka shkruar ministri në profilin e tij në Facebook.