Pas publikimit të audio-incizimit të Shehollit, zbulohen përpjekjet e Serbisë dhe disa gazetarëve, për ta paraqitur Kosovën si vatër të ekstremizmit islamik

Shkruan: Fadil Pushkolli

Publikimi i një video-incizimi nga Fatmir Sheholli ka nxjerrë në pah një dimension shqetësues të luftës informative që po zhvillohet kundër Kosovës. Videoja, e cila aludon për tentativa të qëllimshme për manipulim të opinionit, lidhet me përpjekjet e kahershme të Serbisë për të ndërtuar narrativën se Kosova është një vatër e ekstremizmit islamik — një pretendim që bie ndesh me realitetin sociopolitik të vendit.

Sipas raportit të Institutit PREVENT, Serbia ka përdorur instrumente të ndryshme propagandistike për të ndikuar opinionin ndërkombëtar, përfshirë përhapjen e informacioneve të rreme në media, deklarata alarmiste nga zyrtarët shtetërorë dhe përfshirjen e individëve me profil publik në këtë strategji. Në këtë kontekst, disa gazetarë, përfshirë Visar Duriqin, janë përmendur në debatet publike si figura që, qëllimisht apo jo, kanë përforcuar narrativa që shkojnë në linjë me interesat e propagandës serbe.

Nën petkun e raportimeve për “radikalizëm” dhe “ekstremizëm fetar”, krijohet një figurë e rreme e realitetit të Kosovës, e cila mëton të minojë imazhin ndërkombëtar të vendit dhe të vendosë në dyshim orientimin e tij demokratik dhe laik.

Kjo qasje përbën jo vetëm një sulm ndaj imazhit të Kosovës, por edhe një përpjekje për të përçarë shoqërinë kosovare dhe për të rritur tensionet ndëretnike e ndërfetare. Qytetarët, mediat dhe institucionet duhet të jenë të kujdesshme ndaj këtyre skemave të sofistikuara, duke promovuar transparencën, verifikimin e burimeve dhe mbrojtjen e vlerave demokratike.