Loxha mposht Kasapin për të bronztën në “European Open” në Sarajevë

Xhudistet kosovare, Flaka Loxha e Fationa Kasapi janë përballur në luftë për vend të tretë në “European Open” në Sarajevë.

Të dielën, në kategorinë deri 57 kilogramë, Flaka Loxha fitoi të bronztën, ndërsa Kasapi u rendit e pesta. Lufta mes tyre ishte pa shumë aksion, ndërsa u vendos me dënim. Në kohën shtesë Fationa Kasapi humbi luftën për kapje të gabuar.

Flaka nisi me fitore ndaj turkes Aysenur Karadag, ndërsa më pas e humbi luftën e fituar ndaj britanikes së njohur Chelsie Giles. Ndaj saj realizoi herët “Yuko” që i mjaftonte për fitore.
Por në sekondën e fundit të luftës britanikja realizoi hedhje për uazari.

Në repesazh, Flaka fitoi ndaj britanikes tjetër Lanina Solley e më pas edhe ndaj Kasapit.

26-vjeçarja ishte pa medalje në gara të rëndësishme që nga tetori i vitit të kaluar.
23-vjeçarja Fationa Kasapi kishte ecuri më të mirë në fazë të hershme të garës. Fillimisht e mposhti austriaken Laura Kallinger. Në çerekfinale e mposhti xhudisten e njohur nga Bosnjë-Hercegovina, Angjela Samarxhiq. Në gjysmëfinale Fationa humbi nga sllovenja Nika Tomc e më pas edhe nga Flaka Loxha.

Fationa është duke u kthyer në nivelin e lartë pas telasheve të shumta me lëndime. Dy vjet më parë ishte e treta në Evropianin U23.

Në Sarajevë garuan 164 xhudistë nga 29 shtete të ndryshme. Për Flakën e Fationën ishte garë e rëndësishme. Kosova është përfaqësuar vetëm me këto dy xhudiste.