Japonia dhe Filipinet nënshkruajnë një pakt mbrojtës “përballë kërcënimit të përbashkët” nga Kina

Japonia dhe Filipinet nënshkruan një pakt kyç të mbrojtjes të hënën, duke lejuar dislokimin e forcave japoneze për stërvitje të përbashkëta ushtarake, duke përfshirë stërvitje me zjarr të vërtetë, në kombin e Azisë Juglindore që u vu nën pushtimin brutal japonez në Luftën e Dytë Botërore, por tani po ndërton një aleancë me Tokion ndërsa përballen me një Kinë gjithnjë e më të fuqishme.

Sipas mediave të huaja, përcjell Telegrafi, Marrëveshja e Qasjes Reciproke, e cila në mënyrë të ngjashme lejon forcat filipinase të hyjnë në Japoni për trajnime të përbashkëta luftarake, u nënshkrua nga Sekretari i Mbrojtjes i Filipineve, Gilberto Teodoro dhe ministrja e Jashtme japoneze Yoko Kamikawa në një ceremoni në Manila të dëshmuar nga presidenti Ferdinand Marcos Jr.

“Një rend ndërkombëtar i lirë dhe i hapur i bazuar në sundimin e ligjit është themeli i paqes dhe prosperitetit rajonal”, citohet të ketë thënë ajo. “Ne dëshirojmë të punojmë ngushtë me vendin tuaj për ta ruajtur dhe forcuar këtë”.

Kamikawa dhe ministri japonez i mbrojtjes Minoru Kihara zhvilluan më vonë bisedime me homologët e tyre filipinas mbi mënyrat për të thelluar më tej marrëdhëniet.

Pakti i mbrojtjes me Filipinet është i pari i krijuar nga Japonia në Azi. Japonia nënshkroi marrëveshje të ngjashme me Australinë në vitin 2022 dhe me Britaninë më 2023.

Shtetet e Bashkuara kanë forcuar gjithashtu një hark aleancash ushtarake në Indo-Paqësorin për t’iu kundërvënë më mirë Kinës.

Japonia dhe Filipinet janë aleatë të traktatit të SHBA-së dhe liderët e tyre mbajtën bisedime trepalëshe në prill në Shtëpinë e Bardhë, ku presidenti Joe Biden rinovoi angazhimin “i hekurt” të Uashingtonit për të mbrojtur Japoninë dhe Filipinet.