UEFA shpjegon vendimin e diskutueshëm që çoi tek krijimi i peticionit që ndeshja e Euro 2024 të riluhet

UEFA ka shpjeguar vendimin e diskutueshëm që çoi deri tek krijimi i peticionit që një ndeshje e Euro 2024 të riluhet.

Përballja mes dy peshave të rënda, Gjermanisë dhe Spanjës përfundoi me shumë polemika teksa ekipi i Luis De La Fuentes avancoi në raundin tjetër.

Mikel Merino ishte ‘heroi’ i i Spanjës me golin që shënoi në minutën e 120-të për t’ia siguruar kalimin ‘Furisë së Kuqe’ në gjysmëfinale të Euro 2024.

Por para se Merino të shënonte golin, gjermanët menduan se duhej të kishin marrë një penallti kur gjuajtja e Jamal Musialas goditi dorën e Marc Cucurellas duke bërë që të ‘shpërthejnë’ polemikat.

Vendimi i gjyqtarit kryesor të ndeshjes Anthony Taylor u mbështet nga Stuart Atwell, i cili kishte rolin e gjyqtarit kryesor në VAR.

Organi drejtues i futbollit evropian, ka shpjeguar tani vendimin se pse nuk u akordua penallti andaj sipas Roberto Rosettit, shefit të gjyqtarëve të UEFA-s, ka një shpjegim për këtë.

“Jo çdo prekje me dorë apo krahë është një penallti. Ne duam të konsiderojmë lëvizjen e lojtarëve. Lëvizjet biomekanike. Ju e dini, kjo është një situatë e qartë. Ai rast nuk ishte asnjëherë një penallti”, ka thënë Rosetti.

Spanja kështu tani do të luajë në gjysmëfinale të Euro 2024 ndaj Francës, ndërsa fituesi do të luajë në finalen e madhe me fituesin e ndeshjes tjetër Angli-Holandë.