Osmani ftohet nga Trump në Bordin e Paqes, Rama uron Kosovën

Presidentja Osmani ftohet nga Trump për t’u bërë pjesë e Bordit të Paqes, Rama uron Kosovën dhe marrëdhëniet me SHBA-në

Presidentja e Republikës së Kosovës, Vjosa Osmani, ka pranuar një ftesë nga Presidenti i Shteteve të Bashkuara të Amerikës, Donald Trump, për të përfaqësuar Kosovën në Bordin e Paqes.

Kryeministri i Shqipërisë, Edi Rama, përmes një postimi në platformën X, ka uruar presidenten Osmani për këtë emërim, duke e cilësuar si një “gjest tejet domethënës” nga ana e Presidentit Trump ndaj Kosovës. Rama theksoi se ky hap forcon më tej marrëdhëniet e Amerikës me popullin shqiptar dhe dërgon një mesazh të rëndësishëm për sigurinë dhe përkatësinë e Kosovës në hapësirën e interesit amerikan në botë.

“Edhe njëherë urime, dhe dua të besoj se faktorët politikë të Kosovës do ta çmojnë këtë dorë të shtrirë nga Presidenti i SHBA-së, si një gjest që nuk është aspak pa lidhje me respektin për ty personalisht e për rolin tënd ndërkombëtarisht”, shkruan Rama.

Kujtojmë se ditë më parë edhe kryeministri i Shqipërisë, Edi Rama ka pranuar ftesën e presidentit amerikan Donald Trump për pjesëmarrje në Bordin e Paqes, dhe përgjigja ishte pozitive, ku Rama tha se këtë kërkesë së shpejti do ta dërgojë në Kuvendin e Shqipërisë për miratim.