PZAP ia refuzon si të pabazuara dy ankesat e Bekim Haxhiut

Paneli Zgjedhor për Ankesa dhe Parashtresa, ka refuzuar si të pabazuara dy ankesat e bëra nga kandidati për deputet i PDK-së, Bekim Haxhiu.

Në ankesën e parë, Haxhiu ka thënë se zbatimi i kuotës gjinore nga ana e KQZ-së është bërë në mënyrë automatike dhe mekanike, pa vlerësim proporcional dhe pa baalncim me parimin kushtetues të barazisë së votës, dhe se një zbatim i tillë ka përmbysur renditjen reale të kandidatëve sipas votave të fituara dhe ka cenuar drejtpërdrejt vullnetin e qytetarëve të Republikës së Kosovës, të shprehur përmes votës së lirë, të barabartë dhe të drejtpërdrejtë.

Kjo ankesë e tij ka ardhur pasi ndonëse është rënditur i 20-ti në listën e PDK-së sipas votave personale të fituara, ai ka mbetur jashtë listës përfunditare të deputetëve nga PDK për shkak të kuotës gjinore.

Sipas PZAP-së, ankesa është e pabazuar pasi që sipas tyre KQZ ka vepruar drejt sepse respektimi i kuotës nënkupton përfaqësim minimum 30% të gjinisë së kundërt, andaj vendimi i KQZ-së vendosin se është i drejtë dhe i ligjshëm.

“Paneli, nuk mund të vërtetoj një pretendim të tillë për faktin se pala ankuese pretendimet e tij nuk i ka mbështetur në prova bindëse se njëjti ka qenë i jashtë afatit të pranuara, aq më tepër kur vendimi i KQZ-së për shkurtimin e afateve, i datës 10.12.2025, është miratuar me votat e të gjithë anëtarëve të KQZ-së, për çka kishte pajtueshmëri në mesin e të gjithë anëtarëve të KQZ-së, duke përfshirë edhe përfaqësuesin e subjektit politik në KQZ nga vjen ankuesi, dhe se përveçse nuk është kontestuar nga asnjë palë, ka orientuar secilin akterë që të veprojë në përputhje me këto afate të përcaktuara, e i cili vendim nuk është atakuar në PZAP brenda afateve ligjore për ankesë, për çka edhe tanimë kjo çështje konsiderohet se ka marrë epilog sa i përket rregullsisë së pranimit të votave me postë”, thuhet në arsyetimin e PZAP-së.

Në lidhje me ankesat e tij në PZAP, dje ka njoftuar edhe vetë Haxhiu.

Ai ka thënë se dy ankesat kanë të bëjnë me:

Përfshirjen e 23,323 pakove të fletëvotimeve me postë nga votimi jashtë Kosovës, të pranuara pas afatit ligjor, në kundërshtim me Ligjin për Zgjedhjet e Përgjithshme;

Llogaritjen e gabuar të rezultatit përfundimtar, i cila ka ndikuar në ndarjen e mandateve dhe renditjen e kandidatëve, në zgjedhjet e jashtëzakonshme të mbajtura me 28.12.2025.

“Afatet zgjedhore dhe barazia e votës nuk janë rekomandime, ato garantojnë barazinë e votës dhe besueshmërinë e procesit zgjedhor. Asnjë vendim administrativ i KQZ, nuk mund të ndryshojë ligjin dhe Kushtetutën. Nuk kërkoj privilegj. Kërkoj vetëm zbatim të barabartë të ligjit dhe Kushtetutës. Mbrojtja e votës së ligjshme është mbrojtje e demokracisë”, ka shkruar Haxhiu në Facebook.