Detyron një grua t’i tregojë publikish fëmijës se nuk është nëna e tij biologjike

Aleksandar Vuçiq, president autoritar i Serbisë, është përfshirë në një ngjarje skandaloze.

Sikurse shkruan KOHA, gjatë një vizite në Bor, Vuçiqi ka insistuar që një grua t’i tregojë një fëmije, para të gjithëve, se ajo nuk është nëna e tij biologjike.

Ngjarja ndodhi gjatë një takimi parazgjedhor të Vuçiqit me qytetarë, ku një grua foli për problemet që djali për të cilin përkujdeset ka me sigurimin e terapisë për diabetin. Gjatë bisedës, presidenti kërkoi sqarime të detajuara për situatën, transmeton “Index.hr”.

Sipas raportimeve, gruaja disa herë theksoi se nuk dëshironte të fliste për çështje personale në prani të fëmijës. Megjithatë, Vuçiqi këmbënguli që ajo të shpjegonte publikisht rrethanat.

Në fund, gruaja u detyrua t’i tregojë fëmijës se nuk është nëna e tij biologjike, por kujdestarja, pasi nëna e vërtetë i kishte vdekur.

Ndër reagimet e para ishin edhe ato të studentëve që po mbajnë të bllokuar Fakultetin e Mjekësisë në Novi Sad, të cilët reaguan me një mesazh të shkurtër: “Po jetojmë në ferr”.