Casemiro thotë se Neymari do ta pranonte edhe stolin për Kupën e Botës

Mesfushori i Manchester Unitedit, Casemiro, ka dalë në mbështetje të Neymarit për t’u përfshirë në skuadrën e Brazilit për Botërorin 2026, duke sugjeruar se sulmuesi është i gatshëm të sakrifikojë vendin si titullar për të ndjekur ëndrrën e trofeut.

Me listën përfundimtare të Seleção që pritet të shpallet më 18 maj, mesfushori veteran beson se ylli i Santosit ende ka një rol të rëndësishëm nën drejtimin e Carlo Ancelottit.

Problemet e vazhdueshme me dëmtimet e kanë penguar Neymarin të luajë për kombëtaren që nga viti 2023, shumë kohë para se Ancelotti të merrte drejtimin e Brazilit.

Pavarësisht mungesave të shpeshta për shkak të gjendjes fizike, trajneri italian nuk e ka përjashtuar mundësinë e përfshirjes së 34-vjeçarit në skuadër për turneun e verës.

Është pak e mundshme që ai të jetë titullar për shkak të mungesës së gjatë, por Casemiro, një nga figurat kryesore të ekipit, këmbëngul se bashkëlojtari i tij nuk ka nevojë të jetë ylli kryesor.

“Sipas mendimit tim, Neymari nuk e ka pasur kurrë atë lloj problemi. Ai madje ka moshën dhe përvojën për të qenë një nga kapitenët e kombëtares”, tha Casemiro për “ESPN”.

“Dhe ai kurrë nuk është shqetësuar për këtë në kombëtare. Ai gjithmonë ka thënë: ‘ma jep topin, të argëtohemi dhe të luajmë futboll. Dhe kjo jam unë. Dua të argëtohem në fushë, dua ta shijoj lojën.’ Dhe Neymari gjithmonë e ka treguar këtë”, shtoi ai.

“Neymari kurrë nuk ka pasur rolin e dikujt që do të tregojë forcë apo autoritet. Ai gjithmonë ka qenë një djalë që dëshiron të argëtohet në fushë. Dhe mendoj se nëse flet me të për dëshirën për të luajtur në një Kupë Bote dhe nëse i propozohet [një rol nga stoli] nga Ancelotti, ai do të dëshirojë të jetë pjesë e kombëtares, sepse dëshiron të marrë pjesë. Pastaj ai shkon atje dhe e tregon veten në fushë dhe në stërvitje”, u shpreh ai.

Drejtimin në këtë periudhë tranzicioni e ka Ancelotti, një trajner i njohur për aftësinë për të menaxhuar ego të mëdha dhe rotacione të komplikuara në skuadër.

Casemiro ka qenë i hapur në mbështetjen e tij për trajnerin italian, duke insistuar se nuk ka askënd më të përshtatshëm për të menaxhuar një lojtar me staturën dhe profilin fizik të Neymarit.

Historia e suksesit të Ancelottit me yje me përvojë te Real Madridi dhe Milani ofron një model se si Brazili mund ta përdorë Neymarin në mënyrë efektive.

Casemiro e lavdëroi trajnerin e tij, duke thënë: “Mendoj se duhet të bëhet një bisedë [me Neymarin], t’i thuhet: shiko, nuk do të luash aq shumë ndeshje, por në një ndeshje të caktuar do të jesh vendimtar për 20 ose 30 minuta. Ose do të luash atë ndeshje. Mendoj se është thjesht çështje komunikimi”.

“Pra, e përsëris, gjithçka varet nga ajo që do të mendojë Ancelotti. Ai është ai që merr vendimin dhe nuk ka trajner më të mirë në botë, me më shumë përvojë, për të menaxhuar një situatë të tillë. Jam i sigurt që vendimi që ai do të marrë do të jetë gjithmonë në interesin më të mirë të grupit”, shtoi ai.

Casemiro pranoi se diskutimet e vazhdueshme për vendin e Neymarit në kombëtare janë bërë të lodhshme, por theksoi se nuk e ka shmangur kurrë këtë temë.

“Është e bezdisshme sepse të gjithë flasin për [Neymarin në Kupën e Botës], të gjithë pyesin dhe të gjithë përgjigjen. Sidomos unë. Jam sinqerisht mik i Neymarit – e njoh që kur ishte 12 vjeç. Por sipas mendimit tim është shumë e qartë: Neymar nuk ka nevojë t’i provojë asgjë askujt,” tha ai.

“Gjithçka varet nga fakti nëse ai mund të afrohet sa më shumë me formën e tij më të mirë fizike. Sepse për sa i përket talentit, nuk ka nevojë të diskutohet se çfarë lojtari i madh është”, e mbylli Casemiro.