Lewandowski drejt largimit nga Barcelona? Al-Hilal i bënë ofertë të majme

Robert Lewandowski po përballet me një mundësi serioze largimi nga Barcelona dhe destinacioni i mundshëm duket të jetë Lindja e Mesme, ku interesimi për të është rritur ndjeshëm.

Sulmuesi polak raportohet se është shumë pranë një marrëveshjeje që do t’i sillte një kontratë jashtëzakonisht fitimprurëse, duke e joshur për t’u larguar nga Barcelona gjatë këtij afati kalimtar veror.

E ardhmja e tij në “Camp Nou” është bërë e pasigurt pas raportimeve se klubi saudit Al-Hilal SFC ka bërë një ofertë zyrtare dhe po shtyn fort për transferimin e tij.

Sipas raportimeve nga WP Sportowe Fakty, klubi është i vendosur ta sjellë 37-vjeçarin si përforcim të madh në repartin ofensiv, duke synuar një tjetër emër të madh në futbollin botëror.

Edhe pse në garë për shërbimet e tij janë përmendur edhe klube si Juventus, Milan dhe Chicago Fire nga MLS, duket se Al-Hilal është aktualisht opsioni më serioz dhe më i afërt

Burime pranë negociatave sugjerojnë se Lewandowski është shumë afër pranimit të ofertës, e cila do t’i jepte fund aventurës së tij në La Liga. Oferta financiare është jashtëzakonisht e lartë, duke reflektuar shumat e mëdha që po ofrohen në futbollin saudit.

Raportohet se atij i është ofruar një pagë rreth 90 milionë euro në sezon, një shifër që do ta bënte këtë marrëveshje më të madhen në karrierën e tij.

Megjithatë, pavarësisht raportimeve të mëhershme se faktorë të ndryshëm mund ta pengonin një transferim në Lindjen e Mesme, duket se kushtet financiare kanë ndryshuar plotësisht drejtimin e situatës.