Shekerinska: Angazhimi i NATO-s për Kosovën mbetet i palëkundur

Angazhimi i NATO-s për sigurinë në Kosovë mbetet i palëkundur. Kështu ka deklaruar zëvendëssekretarja e përgjithshme e NATO-s, Radmila Shekerinska, e cila theksoi se aleatët janë të gatshëm dhe të vendosur për të ndihmuar. Ajo tha se kanë bashkëpunim të mirë me institucionet vendore të sigurisë, nga i cili janë ndërtuar kapacitete, njohuri dhe ekspertizë.

Aleanca është e përkushtuar për të mbështetur Kosovën si vend me rëndësi strategjike. Në Bruksel, aty ku janë takuar ministrat e mbrojtjes së vendeve anëtare të NATO-s, vëmendje iu dha edhe Kosovës.

Zëvendëssekretarja e Përgjithshme e NATO-s, Radmila Shekerinska, në një intervistë për RTK-në e ka vlerësuar bashkëpunimin me institucionet e sigurisë në Kosovë. Ajo ka rikonfirmuar se mbështetja për të vazhduar tutje është e padiskutueshme.

“Një numër ministrash, veçanërisht nga Ballkani Perëndimor, por edhe ata të përfshirë në misionet tona në rajon, trajtuan çështjen e Ballkanit. Të gjithë theksuan nevojën për të ruajtur vëmendjen dhe vigjilencën, sepse Ballkani Perëndimor ka rëndësi strategjike për Aleancën. Ne e vlerësojmë bashkëpunimin që kemi pasur me institucionet e sigurisë. Besojmë se angazhimi ynë ka sjellë rezultate pozitive”, deklaroi ajo.

Pas ngjarjeve të vitit 2023, kur personeli i KFOR-it u sulmua, dhe menjëherë pas atyre sulmeve ne rritëm praninë tonë, deklaroi Shekerinska.