FIFA sqaron golin e anuluar të Kroacisë

Ky moment do të mbahet mend gjatë.

Kroacia u përball me një nga vendimet më të çuditshme në historinë e Kupës së Botës në ndeshjen ndaj Portugalisë, ndërsa FIFA ka dalë me sqarim zyrtar për arsyen pse goli i barazimit në minutën e 103-të u anulua nga VAR-i.

Skuadra e udhëhequr nga Luka Modrić u mposht 2-1 nga Portugalia e Cristiano Ronaldos, në një përballje ku luhej kualifikimi në mesin e 16 më të mirave të Botërorit.

Kroacia kaloi e para në epërsi në minutën e 53-të me një gol të Ivan Perišićit dhe për pjesën më të madhe të ndeshjes ishte skuadra më dominuese në fushë.

Portugalia fillimisht mendoi se kishte barazuar përmes Ronaldos, por goli u anulua për pozitë jashtë loje. Pak minuta më vonë, gjithçka ndryshoi pas një penalltie të akorduar për një ndërhyrje ndaj Renato Veigas.

Para kësaj ndeshjeje, Ronaldo nuk kishte shënuar kurrë në fazën eliminatore të Kupës së Botës gjatë karrierës së tij 20-vjeçare në këtë turne. Por 40-vjeçari mori përgjegjësinë dhe realizoi nga pika e bardhë për ta barazuar rezultatin në 1-1.

Më vonë, ylli portugez u zëvendësua, një vendim që u prit me fishkëllima ndaj trajnerit Roberto Martinez. Megjithatë, lojtari që hyri në vend të tij, Gonçalo Ramos, shënoi golin e fitores në minutën e 94-të.

Drama nuk përfundoi aty. Në minutën e 103-të, Joško Gvardiol mendoi se kishte barazuar rezultatin për Kroacinë me një finalizim të saktë brenda zonës, duke mposhtur portierin Diogo Costa.

Por goli u anulua për pozitë jashtë loje, për shkak të dy lojtarëve të përfshirë në aksion: Igor Matanović dhe Mario Pašalić.

Në aksionin që çoi te goli, një krosim u dërgua në zonë dhe fillimisht u duk sikur Matanović nuk e preku topin me kokë. Topi më pas u përplas në shpinën e portugezit Renato Veiga dhe përfundoi te Pašalić, i cili e ktheu atë drejt portës për Gvardiolin.

Megjithatë, nëse Matanović kishte prekur topin në atë moment, atëherë Pašalić ishte në pozitë të dukshme jashtë loje kur mori topin dhe asistoi për golin kroat.

Gjyqtari norvegjez Espen Eskas u thirr te monitori i VAR-it për të parë disa kënde të incidentit, por asnjëri prej tyre nuk dukej se jepte prova të qarta nëse Matanović e kishte prekur vërtet topin.

Fillimisht u krijua përshtypja se Eskas kishte vendosur në bazë të pamjeve televizive, duke e konsideruar prekjen si të mjaftueshme për të shpallur Pašalićin jashtë loje dhe për t’ia mohuar Kroacisë një barazim dramatik.

Por shpjegimi që doli më pas lidhet me sensorët e vendosur brenda topit zyrtar të Botërorit 2026, të cilët regjistrojnë edhe prekjet më të lehta. Sipas këtij sistemi, u konfirmua se Matanović kishte prekur topin, duke e bërë aksionin të vlefshëm për kontrollin e pozitës jashtë loje.

Vendimi shkaktoi reagime të ashpra në rrjetet sociale. Shumë tifozë pyetën pse gjyqtari u thirr te monitori nëse teknologjia e sensorëve kishte dhënë tashmë konfirmimin.

“Ende nuk kam parë një kënd ku duket qartë se ai e preku topin”, shkroi një tifoz. Një tjetër pyeti: “Nëse ai sensor ekziston vërtet, pse u thirr gjyqtari te monitori?”

Edhe kjo pyetje mori sqarim. Sipas raportimeve, gjyqtari u thirr për të kontrolluar nëse Renato Veiga kishte bërë një tentim të qëllimshëm për të luajtur topin. Nëse kontakti i tij do të konsiderohej veprim i qëllimshëm, atëherë pozita jashtë loje nuk do të vlente.

Incidenti shkaktoi polemika të mëdha, ndërsa FIFA reagoi me një deklaratë zyrtare për të shpjeguar vendimin.

Në njoftimin e publikuar në platformën X, krahas një pamjeje të momentit, FIFA konfirmoi se sensorët brenda topit kishin regjistruar prekjen e Matanovićit.

“Sipas të dhënave të ofruara nga teknologjia Connected Ball Technology, e vendosur brenda topit Adidas Trionda, topi zyrtar i Kupës së Botës FIFA, u vërtetua se kishte kontakt nga Igor Matanović i Kroacisë në aksionin që çoi te goli kundër Portugalisë. Kjo i mundësoi gjyqtarit të përcaktojë saktë pozitën jashtë loje dhe të anulojë golin”, thuhet në deklaratën e FIFA-s.

FIFA shtoi se sensorët IMU brenda topit Trionda janë në gjendje të përcaktojnë edhe kontaktet më të lehta, të cilat shfaqen për shikuesit në transmetim si një “grafikë e rrahjeve të zemrës”. Sipas organit qeverisës të futbollit, kjo u jep zyrtarëve të ndeshjes një nivel të paprecedent të të dhënave për të marrë vendime më të shpejta dhe më të sakta. /GazetaExpress/