Alonso konfirmon ftesën e Mbappes, i kundërpërgjigjet Karim Benzemas

Trajneri i Real Madridit, Xabi Alonso, ka konfirmuar se Kylian Mbappé do të jetë i gatshëm për të luajtur ndaj Alavesit të dielën në mbrëmje, në një ndeshje që shumëkush po e konsideron vendimtare për të ardhmen e Alonsos në klub.

“Los Blancos” do të udhëtojnë drejt Vitoria-Gasteiz me të paktën tetë mungesa.

Mbappé është pa dyshim lojtari që Alonso do të donte më së shumti ta kishte sërish në dispozicion, pasi ai mungoi në përballjen me Manchester Cityn. Të shtunën, francezi u stërvit normalisht.

“Ai është i gatshëm për të luajtur, e kemi përsëri me ne. Do të vendosim nesër. Kjo është padyshim një lajm i mirë,” komentoi Alonso.

Megjithatë, trajneri nuk dha një përditësim për gjendjen fizike të Fede Valverdes, Antonio Rüdigerit apo Dean Huijsenit, të cilët janë ftuar, por nuk dihet se a do të luajnë.

Alvaro Carreras, Fran Garcia dhe Endrick Felipe do ta humbasin ndeshjen pasi u ndëshkuan me karton të kuq ndaj Celta Vigos.

“Kemi tre lojtarë të pezulluar, kjo është pjesë e lojës. Nuk kemi shumë lojtarë në dispozicion, ndaj e kemi plotësuar skuadrën me futbollistë nga Castilla, të cilët gjithmonë japin maksimumin. Për nesër do të shkojmë me ata që janë të gatshëm”, tha ai.

Duke folur pas humbjes së Real Madridit ndaj Manchester Cityt, Karim Benzema kishte komentuar se ish-skuadra e tij po vuante mungesë kohezioni dhe lidershipi. Alonso shpjegoi se vështirësitë aktuale mund të shërbejnë si diçka pozitive nëse arrijnë t’i kapërcejnë.

“Ne jemi bashkë në dhomën e zhveshjes çdo ditë. Kemi përjetuar momente të mira dhe jo aq të mira. Besojmë gjithashtu se mund të rritemi nëse i kalojmë këto momente të vështira dhe e ndryshojmë situatën. Ndoshta në të ardhmen do të shohim pas dhe do të themi sa e vështirë ishte, por ja ku jemi. Karimi e ka atë përvojë dhe atë përgjegjësi për të marrë vendime”, tha ai.

Alonso u përball me një mori pyetjesh për të ardhmen e tij dhe në mediat lokale është raportuar se, në rast shkarkimi, trajneri i Castillas dhe miku i tij, Alvaro Arbeloa, mund të marrë drejtimin e skuadrës.

Të dy u panë duke biseduar në qendrën stërvitore të Real Madridit, por Alonso hodhi poshtë idenë se bëhej fjalë për një lloj dorëzimi stafete.

“Alvaro mund të jetë trajner i Real Madridit në të ardhmen, ai po bën shumë mirë. Folëm për lojtarët që mund ose jo të bashkohen me ekipin e parë. Por për atë që po më pyet, nuk folëm aspak”, përfundoi ai.