Kronikë e zezë

Arrestohet në Liban 49-vjeçari i dyshuar për vrasjen e vajzës së tij në Tiranë

Posted on by botaelajmeve

Një ngjarje tragjike që tronditi opinionin publik shqiptar ka shënuar një zhvillim të rëndësishëm, në Liban është arrestuar 49-vjeçari Fadi Alwan, shtetas palestinez, i cili dyshohet se rreth dy muaj më parë vrau me thikë vajzën e tij, Rayan Alwan, në një apartament në rrugën “Gjon Muzaka” në Tiranë.

Arrestimi i tij u realizua si pjesë e një operacioni të përbashkët mes autoriteteve shqiptare dhe libaneze, me ndërmjetësimin e Interpol Tiranës dhe Interpol Beirutit. Qëllimi është ekstradimi i tij në Shqipëri, ku ndaj tij është lëshuar urdhër-arresti nga Gjykata e Shkallës së Parë në Tiranë, me masën e sigurisë “arrest në burg”.

Ngjarja ndodhi në muajin shkurt të këtij viti, ku 49-vjeçari dyshohet se kreu vrasjen brenda banesës ku jetonte me vajzën e tij. Krimi është cilësuar si “vrasje për shkak të marrëdhënieve familjare”, një vepër penale e rëndë sipas Kodit Penal shqiptar.

Edhe pse Shqipëria dhe Libani nuk kanë një marrëveshje bilaterale për ekstradimin, palët po referohen në një konventë ndërkombëtare për të mundësuar kthimin e Alwan në Shqipëri dhe përballjen e tij me drejtësinë.

Aktualisht, autoritetet po vijojnë procedurat ligjore ndërkombëtare dhe bashkëpunimi me Interpol-in për të finalizuar ekstradimin e të dyshuarit.