Bekë Berisha i “hyn fuqishëm” fushatës me profile të rrejshme në Facebook!

Edhe pse zyrtarisht fushata zgjedhore për zgjedhjet lokale të 12 tetorit fillon më 12 shtator, kandidatët për kryetarë dhe ata për Kuvende Komunale, tashmë e kanë nisur fushatën.

Ata po takojnë qytetarë nga të gjitha grupet e shoqërisë, duke u munduar të marrin sa më shumë vota.

Përveç kësaj, kandidatët po punojnë edhe me rrjete sociale, duke postuar foto dhe video nga aktivitetet e përditshme.

Mirëpo, ka edhe të tillë që me profile të rrejshme, sidomos në Facebook, po tentojnë të krijojnë opinion se janë duke u pëlqyer nga qytetarët.

Njëri nga ata është edhe Bekë Berisha, kandidati i AAK-së për kryetar të Prishtinës.

Dikur kandidat për kryetar të Istogut, Beka kësaj herë ka vendosur të “bëhet prishtinali”. E të qenit prishtinali, duket se e ka shtyrë atë ose njerëzit që i qëndrojnë pas, ta paraqesin si njeriu që do t’i zgjidh problemet e kryeqytetit!

Ballkani.info ka disa ditë që është duke e përcjellë aktivitetin e Berishës në Facebook dhe aty ka vërejtur që shumë profile që ia bëjnë “like” ose komentojnë, janë të hapur rishtazi. Përveç që të hapur tash, këto profile në Facebook “shihen prej aeroplanit” se nuk janë të vërteta.

Ajo që bie në sy është komentimi me “gjuhë standarde” shqipe, si dhe lëvdatat pak a shumë të ngjashme për Bekë Berishën.

Nuk e di nëse kjo strategji do t’i  “dhezë” Bekës, kjo mbetet të shihet më 12 tetor, kur këto profile i drejtohen kutive të votimit!