Të premten, Presidenti i Serbisë, Aleksandar Vuçiq, ka deklaruar se “të gjithë po përgatiten për luftë”, duke përmendur në mënyrë të veçantë edhe Kosovën.
Kjo deklaratë ka ngritur reagime të shumta në opinionin publik dhe mes analistëve politikë, të cilët e shohin si pjesë të strategjisë së vjetër të Beogradit për të krijuar tensione në rajon.
Ai ka thënë se: “E dimë tashmë se do të ketë luftë, dhe do të ketë, po jua them unë, sepse e shoh çfarë po ndodh dhe si po përgatiten të gjithë. Askush nuk po përgatitet për bisedimet, ata thjesht po shikojnë se kush do të jetë në anën e kujt. Ata po gërmojnë llogoret e tyre dhe po e presin fillimin”, ka deklaruar Vuçiq.
Analisti Driton Tali, në një prononcim për “Bota sot”, thotë se deklarata e Vuçiçit mund të ketë dy qëllime — frikësimin e qytetarëve serbë para protestës së 1 nëntorit dhe shfrytëzimin e tensioneve të rritura nga provokimet ruse për ndonjë veprim në Bosnje apo Kosovë.
“Për një aso lufte çfarë u shpreh Vuçiç ende nuk ka indikacione. Ajo deklaratë mund të shikohet nga dy prizma sipas mendimit tim. E para, tenton që qytetarët serbë t’i friksojë në prag të kësaj proteste të madhe kundër tij që po flitet se po organizohet me 1 nëntor, në përvjetorin e tragjedisë së Novi Sadit, kur ra çatia e stacionit trenit me çka vdiqën 16 persona.
Dhe e dyta, sepse tashti me këto provokimet e fundit që i bëri Rusia me shkeljet arjore qoftë me avionë në Findlandë apo dronë në Gjermani, Danimarkë e Norvegji janë rritur tensionet, dhe mbase mund ta shfrytëzojë rastin për të organizuar diçka në Bosnje apo Kosovë”, shprehet ai.
Tali shtoi se disa analistë perëndimorë tashmë e shohin situatën si “gjendje lufte”, por jo me mjete tradicionale, por përmes operacioneve hibride, sulmeve kibernetike dhe tensioneve lokale.
Ai përmendi edhe Moldavinë, ku Rusia po intensifikon fushatën destabilizuese pas fitores pro-evropiane në zgjedhje. Ndërkohë, disa shtete perëndimore po përgatiten për skenarë emergjentë, si Franca me masat për spitalet.
Megjithatë, sipas Talit, institucionet e sigurisë së Kosovës dhe aleatët e saj janë vigjilentë, ndaj nuk ka arsye për panik — Vuçiçi, sipas tij, edhe këtë herë do të dështojë.
“Lidhur me tensionet e ngritura, duhet cekur se edhe disa analistë të ndryshëm perendimorë situatën e tashme po e trajtojnë si gjendje lufte. Por jo në mënyrën e Vuçiçit, pra me tanke, avionë dhe bombardime, por me operacione hibride, sulme kibernetike, tensione në kufij, mbështetje indirekte, dhe eskalime lokale.
Në lidhje me eskalimet e mundshme lokale siç bie fjala Bosnja, Kosova Mali i Zi etj, duhet përmendur se tashti sfundmi ju është shtuar edhe Moldavia, pas zgjedhjeve të fundit, të javës së kaluar, ku opsioni pro-europian fitoi bindshëm. Për çka Rusia ka intensifikuar fushatën e saj hibride për të destabilizuar atë vend si bie fjala me intesifikim të akuzave për manipulime zgjedhore, sulme kibernetike shantazhe e presione në energjetikë si dhe nxitjen për protesta masovike qoftë në gjithë Moldavinë qoftë në Transnistrinë “ruse”.
Pastaj i kemi edhe këto përgatitjet që shtetet Perëndimore po i bëjnë si me “Planin për furnizimin e mjaftueshëm të familjeve me gjëra emergjente për 72 orë”, apo me “përgtitjen e spitaleve” siç e bëri me 14 korrik, Ministria e Shëndetësisë e Francës, kur kërkoi që “spitalet të jenë të gatshme për një përfshirje ushtarake të madhe” ku mund të trajtohen një numër i madh i të plagosurve, deri në 50000, për një periudhë deri në 180 ditë.
Prandaj, në këtë atmosferë gjeopolitike të krijuar të shohim se Vuçiçi çka ka ndërmend dhe çfarë po përgatitë.
Unë besoj se institucionet e sigurisë të Kosovës së bashku me ato të KFOR-it dhe të shteteve tona mike janë, duke e përcjellur situatën me vëmendje të shtuar, andaj nuk ka nevojë për panik, dhe Vuçiçi edhe kësaj herë do të dështojë” – përmbyll Tali
Pëlqejeni këtë:
Pëlqejeni Po ngarkohet…
Të tjera
Belgjika s’tregon se a do burgje në Kosovë, Qeveria Kurti thotë se s’ka nisur ndonjë ‘pazar’ me ta, e as s’ka kompetenca
Reagimet për koalicionin e Tahirit me VV, Abdixhiku paralajmëron përgjigje me kohë për “punët brenda shtëpisë”
Bie çmimi global i naftës