Aktuale, Lajme

Dyshime për manipulim zgjedhor në Kllokot: Intervistohen 14 persona

Posted on by botaelajmeve

Falsifikim votash në Kllokot, 14 të dyshuar arrestohen dhe më pas lirohen

Policia e Kosovës ka arrestuar dhe intervistuar dje në Kllokot 14 persona, kryesues dhe anëtarë të komisioneve numërues në Qendrën Komunale të Numërimit (QKN), nën dyshimin e bazuar për falsifikim të rezultateve të votimit që lidhen me zgjedhjet e 28 dhjetorit 2025.

Pas intervistimit në cilësinë e të dyshuarve, dhe me vendim të prokurorit, të gjithë të arrestuarit janë liruar.

Rasti vazhdon të hetohet nga organet kompetente.

Intervistohen 14 të dyshuar për falsifikim të rezultateve të votimit në Kllokot

Policia e Kosovës ka arrestuar dhe intervistuar 14 persona – kryesues dhe anëtarë të komisioneve numëruese – nën dyshimet për falsifikim të rezultateve të votimit në Qendrën Komunale të Numërimit (QKN) në Kllokot.

Deri më tani, për shkak të dyshimeve për manipulim të votave janë ndaluar dhjetëra persona në disa rajone të Kosovës dhe janë intervistuar qindra të tjerë. Hetime po zhvillohen në Prizren, Malishevë, Podujevë, Ferizaj dhe Mitrovicë.

Koordinatorja nacionale për zgjedhje, Laura Pula, e ka cilësuar procesin zgjedhor të 28 dhjetorit si ndër proceset “më të kompromentuara”, pasi janë vërejtur mospërputhje të mëdha në numrin e votave të kandidatëve për deputetë pas një rinumërimi të pjesshëm të urdhëruar nga Komisioni Qendror i Zgjedhjeve (KQZ). Më pas, KQZ-ja urdhëroi rinumërim të plotë të votave, i cili përfundoi në fundjavën që shkoi.

Pula ka thënë se edhe kandidatët të cilëve u janë shtuar votat do të jenë objekt i hetimeve, por deri më tani nuk është bërë e ditur nëse ndaj ndonjërit prej tyre kanë nisur procedura hetimore.

Pas përfundimit të rinumërimit, më 31 janar, KQZ-ja ka shpallur rezultatet përfundimtare, duke i hapur rrugë formimit të institucioneve të reja të vendit.

Nga ulëset e rezervuara për minoritetin serb, nëntë ulëse i ka fituar Lista Serbe dhe një ulëse Partia për Liri, Drejtësi dhe Mbijetesë.