SHBA-ja nuk do të ndjekë asnjë politikë që mbështet shkëmbimet e territoreve, shkëputjen ose forma të tjera të ri-vizatimit të kufijve përgjatë vijave etnike në Ballkanin Perëndimor.
Kështu thuhet në një projektligj të datës 9 tetor 2025 të Kongresit amerikan, i cili për herë të parë përfshin edhe paragrafin mbi “mos ndryshimin e kufijve” në Ballkan.
Projektligji i është referuar Komitetit për Punë të Jashtme dhe Komitetit të Drejtësisë, për shqyrtim të pjesëve që i përkasin juridiksionit të secilit, por afati i shqyrtimit nuk është përcaktuar ende.
Ky është një lajm i mirë për Kosovën, pasi jo rrallëherë në të kaluarën është përmendur shkëmbimi i territoreve nga politikanët shqiptarë.
Ligji promovon gjithashtu biseda bilaterale, iniciativa konkrete për rritjen e tregtisë dhe investimeve, si dhe mbështetje nga SHBA-ja për një marrëveshje përfundimtare.
Në seksionin e projektligjit, që merret me raportet midis Kosovës e Serbisë, thuhet se marrëveshja për normalizimin e marrëdhënieve mes dy vendeve, e arritur më 27 shkurt 2023 me mbështetjen e BE-së duhet të zbatohet shpejt.
Se çka do të thotë ky vendim folën njohësit e çështjeve politike e ndërkombëtare.
Ymeri: Projektligji i Kongresit amerikan i 09 tetorit 2025 është shumë i drejtë për Republikën e Dardanisë, kur është fjala për mosshkëmbime territoresh
Së pari, profesori Eshref Ymeri e mirëpriti këtë vendim për ndalim të shlëmbimit të territoreve, derisa tha se është në të mirë të Dardanisë.
Ai në bashkëbisedimin me “Bota sot” u shpreh se, sa i përket ndryshimit të kufijve duhet të kundërshtohet, pasi që dihet se kombi shqiptar është copëtuar në Kongresin e Berlinit.
“Projektligji i Kongresit amerikan i 09 tetorit 2025 është shumë i drejtë për Republikën e Dardanisë, kur është fjala për mosshkëmbime territoresh në Ballkanin Perëndimor. Por në atë Projektligj përfshihet edhe paragrafi për mosndryshimin e kufijve në Ballkan.
Menjëherë pas publikimit në mjetet e informimit masiv të këtij Projektligji me këtë paragraf, qeveritë dhe presidencat e të dyja shteteve shqiptare, duhej të reagonin menjëherë dhe t’i drejtoheshin Kongresit amerikan, duke u shprehur kundër atij paragrafi. Kjo për arsye se në Ballkan ekziston një Çështje Madhore e Pazgjidhur e Kombit Shqiptar, me një prapavijë 112-vjeçare – copëtimi i trojeve tona etnike në Kongresin e Berlinitt të vitit 1878 dhe në Konferencën e Londrës të vitit 1913”, shpjegoi ai.
Krahas kësaj Ymeri rikujtoi një deklaratë të Merkel, e që tha se duhet shqiptarët t’ia përmendin Kongresit Amerikan.
“Shteti shqiptar u nda gjatë luftërave ballkanike e gjatë Luftës së Parë Botërore. Shqipëria është i vetmi shtet në botë që kufizohet në të gjitha anët me bashkëkombësit e vet”. Merkel më pastaj do të shprehet se dëshirë e saj është ta shohë një Shqipëri ashtu si e ka krijuar Zoti. Pas pyetjes së një gazetari gjerman se, “përse kjo përkujdesje ndaj shqiptarëve nga ana e Angela Merkel”, ajo do të shprehet fare shkurt: “Ua kemi borxh” (Faqja e internetit “Kospress”. 19 janar 2023. Koment i Naim Kelmendit)”.
Ndër të tjera, profesori kritikoi ashpër politikanët shqiptarë që nuk e ngritën zërin në forumet ndërkombëtare për ribashkim të trojeve tona shqiptare.
Shabani: Shkëmbimi i territoreve është një iniciativë e rrezikshme
Kurse, njohësi i çështjeve ndërkombëtare, Amir Shabani shkëmbimin e territoreve e cilësoi si iniciativë të rrezikshme.
Ai në prononcimin e tij për “Bota sot” u shpreh se kjo çështje jo rrallëherë ka shkaktuar debate të forta në Kosovë dhe në rajon të Ballkanit.
“Shkëmbimi i territoreve është një iniciativë e rrezikshme për gjithë shtetet e Ballkanit Perëndimor në përgjithësi dhe për Kosovën në veçanti. Ndonëse është diskutuar që veriu i Kosovës me shumicë serbe t’i jepet Serbisë, ndërsa jugu i Serbisë me shumicë shqiptare t’i jepet Kosovës, kjo gjë ka shkaktuar debate në tërë rajonin, pasiqë një iniciativë e tillë do depërtonte edhe në Bosnjë me Reuplika Srpska dhe në Maqedoninë e Veriut ku komuniteti i dytë më i madh në vend janë shqiptarët dhe kjo do krijonte destabilizim të pakontrolluar”.
Gjithashtu, ai potecoi se, përveç SHBA, këtë qëndrimin e kanë pasur edhe aleatët evropianë të shtetit tonë, si dhe vetë qeveria aktuale e Kosovës.
“Përveç SHBA-së që kanë deklaruar për mosprekjen e territoreve edhe aleatët kryesorë të Kosovës në Evropë, si Franca dhe Gjermania, po edhe Britania – kanë thënë se thirrjet për ndryshim të kufijve të Ballkanit Perëndimor mund të sjellin destabilizim.
Këtë qëndrim e ka sot Qeveria e Kosovës, e cila thotë se përpjekja eventuale për ndarje të Kosovës, nën petkun e shkëmbimit territorial, nuk është projekt paqësor dhe ndez konflikt të gjerë e të gjatë në tërë Ballkanin”, nënvizoi ai.
Në fund, theksoi që, shkëmbimi i territoreve nuk do të rikthehet si temë, sepse liderët politik kanë ndryshuar, nuk janë të kaluarit.
“Është e vërtetë se Vuçiqit do t’i konvenonte rikthimi i kësaj ideje në diskutim, por ajo nuk përkon më me realitetin në terren.
Kështu që, mendoj se shkëmbimi i territoreve nuk do të rikthehet si temë diskutiminë të njëjtën mënyrë si më parë, sepse liderët politik kanë ndryshuar – së paku njëri prej tyre. Marrëveshja është folur në kuadër të një pajtimi mes Thaçit dhe Vuçiqit, të cilët i kanë besuar njëri-tjetrit, mirëpo në përballje me Albin Kurtin kjo temë thuaj se është e “vdekur””, përmbylli Amir Shabani
Të tjera
Punime në rrjet, KEDS tregon se ku do të ketë ndërprerje të rrymës të dielën në Ferizaj
Këto ushqime ju ndihmojnë të mbroni imunitetin
Profesionet që bëjnë keq për zemrën