Garat në gjuajtje me armë zjarri në shënim të 26-vjetorit të Policisë

Në kuadër të aktiviteteve sportive të planifikuara me rastin e shënimit të 26-vjetorit të Policisë së Kosovës, sot Policia e Kosovës ka zhvilluar garat në gjuajtje me armë zjarri, në poligonin e hapur në Cërnushë – Mitrovicë, transmeton KosovaPost.

Në këto gara pjesëmarrës ishin tetë ekipe policore nga departamente dhe drejtori të ndryshme, të përfaqësuara me nga tre garues. Garat u zhvilluan në disiplinat ekipore dhe individuale, duke pasqyruar nivel të lartë profesional, disiplinë dhe frymë sportive dhe duke dhënë rezultatet si në vijim:

Rezultatet ekipore:

Vendi i parë: Departamenti i Njësive Speciale

Vendi i dytë: Drejtoria Rajonale Pejë

Vendi i tretë: Drejtoria e Njësive për Ndërhyrje të Shpejtë (DNJNSH)

Rezultatet individuale:

Vendi i parë: PK Ardian Dvorani – Departamenti i Njësive Speciale

Vendi i dytë: PK Bledian Hajdari – DRP Prizren

Vendi i tretë: PK Arlind Xhokli – DRP Ferizaj

Këshilli Organizativ me angazhim profesional ka realizuar me sukses garat sipas planit, me mbikëqyrje dhe përkrahje nga Shoqata e Sportit të Policisë së Kosovës të cilët monitoruan në mënyrë të plotë zhvillimin e garave.

Ky aktivitet, përveç që afirmon shkathtësitë profesionale të pjesëtarëve të Policisë së Kosovës, ka për qëllim edhe forcimin e disiplinës, frymës sportive dhe bashkëpunimit brenda organizatës së PK-së.

Policia e Kosovës mbetet e përkushtuar në promovimin e profesionalizmit dhe afrimin me komunitetin përmes aktiviteteve të llojeve të tilla.