Gashi: Vazhdimi i përpjekjeve për të cenuar rendin Kushtetues është i dëmshëm veçanërisht për VV

Deputeti i Lidhjes Demokratike të Kosovës, Arben Gashi, ka thënë se i takon partisë së parë, në këtë Lëvizjes Vetëvendosje, që të propozoi kandidatin për të parin e kuvendit, por që të njëjtës i takon edhe që të ofrojë zgjidhje për të dalë nga situata e krijuar me ngërçin për konstituimin e parlamentit.

Gashi ka komentuar edhe çështjen e procedurës së votimit në seancën konstituive, duke deklaruar se ndryshimi i saj mund të bëhet përmes një mocioni për anashkalim të rregullores së punës së kuvendit, e që pastaj duhet të miratohet me votim për procedurën e re.

Ai ka shtuar se, mocioni në fjalë do të ishte obligativ për të gjithë deputetët që të marrin pjesë në votim.

‘‘Vazhdimi i përpjekjeve për të anashkaluar procedurat dhe për të cenuar rendin kushtetues dhe rregullat e miratuara, është i dëmshëm për të gjithë skenën politike pa dallim, por veçanërisht për partinë që ka dalë e para në zgjedhje’’, ka thënë ai mes tjerash.

Postimi i plotë:

I pari në rezultat, i vetmi me të drejtë për të propozuar, por edhe i pari në obligim për të ofruar zgjidhje.

Në lidhje me procedurën e votimit në seancën konstituive të Kuvendit, ritheksojmë se kjo procedurë është vendosur në mbledhjen përgatitore të zhvilluar sipas Kushtetutës dhe Rregullores, nga Kryesia e legjislaturës paraprake. Çdo ndryshim i saj mund të bëhet vetëm përmes një mocioni procedural për anashkalimin e Rregullores së punës së Kuvendit, dhe pastaj të miratohet me votim për procedurën e re. Një mocion i tillë do të ishte obligativ për të gjithë deputetët që të marrin pjesë në votim.

Vazhdimi i përpjekjeve për të anashkaluar procedurat dhe për të cenuar rendin kushtetues dhe rregullat e miratuara, është i dëmshëm për të gjithë skenën politike pa dallim, por veçanërisht për partinë që ka dalë e para në zgjedhje. Sepse i pari në rezultat, është jo vetëm i pari në të drejtën për të propozuar, por edhe i pari në obligimin për të respektuar rregullat dhe Kushtetutën, si dhe për të ofruar zgjidhje.