Gjykata Kushtetuese ka dy rrugë për zgjidhjen e ngërçit në Kuvend

Ushtruesi i detyrës së Ministrit të Drejtësisë, Blerim Sallahu  ka paraqitur dy zgjidhje kushtetuese që i mbesin në dorë Gjykatës Kushtetuese për të zgjidhur ngërçin institucional në Kuvendin e Kosovës.

Sipas Sallahut, zgjidhja e parë është që Gjykata Kushtetuese, duke u mbështetur në nenin 67 paragrafi 4 të Kushtetutës, të konstatojë se refuzimi i Listës Serbe për të propozuar kandidat për nënkryetar të Kuvendit nënkupton heqje dorë nga kjo e drejtë.

Me këtë, ai vlerëson se procesi i konstituimit të Kuvendit është përmbyllur, duke e krahasuar këtë situatë me një aktgjykim të mëparshëm për mosparaqitjen e mandatarit për formimin e Qeverisë, që ishte interpretuar si humbje e të drejtës kushtetuese.

Ndërkohë, zgjidhja e dytë sipas tij është autorizimi i Presidentes për shpallje të zgjedhjeve të jashtëzakonshme.

Sallahu ka theksuar se çdo vendim tjetër i Gjykatës që bie ndesh me Kushtetutën do ta vendoste Republikën në varësi të një subjekti politik që, sipas tij, çdo ditë minon rendin kushtetues të vendit.