Halil Geci: Kush do të mbajë përgjegjësi për vrasjet e proamerikanëve në Kosovë?

Veprimtari Halil Geci kërkon zbardhjen e atentateve dhe ekzekutimeve politike ndaj mbështetësve të Rugovës, LDK-së dhe SHBA-së, përfshirë Xhemajl Mustafën dhe Smajl Hajdarin.

Sipas tij, autorët e këtyre krimeve duhet të dalin para drejtësisë, pasi çdo tentim për mohimin e tyre mbetet njollë morale e politike, dhe se drejtësia kërkohet jo për hakmarrje, por për ta çliruar shoqërinë nga frika dhe krimi politik.

Postimi i plotë:

KUSH DO TË MBAJË PËRGJEGJËSI PËR VRASET E PROAMERIKANËVE NË KOSOVË?

A kujtojnë urdhrat për vrasjen e proamerikanëve si Xhemajl Mustafa, i cili kishte vetëm një “armë” – stilolapsin? Pse duhej të vritej një intelektual që punonte për Kosovën, për LDK-në dhe për Amerikën?

Pse u vra Smajl Hajdari, një komandant i suksesshëm dhe mbështetës i Rugovës e i Amerikës? Kush i shpalli tradhtarë atdhetarët e Kosovës? Kush lëshonte komunikata nepër “banhofeve”, duke vrarë e kërcënuar dhe frikësuar gjithë ata që mbështesnin Rugovën dhe perëndimin?

Këto vrasje nuk mund të mbeten të paadresuara. Sot po i numëron Haga, nesër do t’i numërojë historia, do t’i gjykojë edhe vetë populli. Koha ka ardhur që përgjegjësit të përballen me drejtësinë, të kërkojnë falje publike dhe të lehtësojnë barrën e gjakut që i rëndon këtij vendi.

Çdo tentim për mohimin e këtyre krimeve do të mbetet njollë morale dhe politike. Historia nuk fal. Drejtësia duhet të vihet në vend – jo për hakmarrje, por që shoqëria jonë të ecë përpara e lirë nga frika dhe krimi politik.