​Hargreaves kërkon formimin urgjent të institucioneve të reja

Ambasadori i Britanisë së Madhe në Prishtinë, Jonathan Hargreaves, ka bërë thirrje për formimin urgjent të institucioneve të reja të Kosovës pas dy dështimeve të konstituimit të Kuvendit të dalë nga zgjedhjet parlamentare të 9 shkurtit.

Diplomati britanik në një postim në Facebook ka shkruar se qytetarët e Kosovës kanë të drejtë të presin bashkëpunim nga liderët politikë në interes kombëtar,..

”Më shumë se dy muaj pas zgjedhjeve, Kosova ka urgjentisht nevojë për një Kuvend dhe një qeveri funksionale. Qytetarët kanë të drejtë të presin që udhëheqësit e tyre politikë të bashkëpunojnë në interes të vendit”, ka shkruar ai.

Konstituimi i legjislaturës së nëntë ka dështuar për herë të dytë brenda dy ditësh. Kryesuesi Avni Dehari nga LVV-ja ndërpreu seancën pasi sipas tij, nuk kishte konsensus me përfaqësuesit e partive politike se si të veprohet tutje. Seanca e re e radhës është thirrur për datën 19 prill, ora 12:00.

Kryetari i LDK-së, Lumir Abdixhiku tha sot se nuk kanë ndryshuar qëndrim sa i përket votimit të raportit për verifikimin e mandateve të deputetëve. Abdixhiku tha se nuk do ta votojnë as sot raportin derisa Qeveria Kurti të jep dorëheqje.

Ish-shefja e Grupit parlamentar të Lëvizjes Vetëvendosje, Mimoza Kusari-Lila, pas ndërprerjes së seancës konstituive, tha se nëse opozita nuk dëshiron të bisedojë rreth raportit për verifikim e mandateve të deputetëve, “atëherë mund të drejtohen për zgjedhje të reja.”

Deputetja e zgjedhur e Aleancës për Ardhmërinë e Kosovës, Time Kadrijaj tha se kryeministri në detyrë Albin Kurti po mundohet që në mënyrë të jashtëligjshme ta bëjë zvarritjen e konstituimit të Kuvendit të Kosovës, meqë “nuk i ka votat për formimin e qeverisë”.