Ish-gazetari i luftës kritikon ashpër Kosovën dhe Shqipërinë për Kosharen: Ja pse është beteja më e vjedhur…

Duke përkujtuar Betejën e Koshares në përvjetorin e 26-të saj, ish gazetari gjatë luftës për Kosovën, Rexhep Shahu, thotë Kosharja, është beteja më e vjedhur në historinë e Kosovës, pasi të gjallët asnjëherë nuk i kanë vlerësuar sa duhet të rënët në këtë betejë.

“Është beteja me epike e luftëtarëve të Kosovës, ballë për ballë, beteja më e vjedhur kush mundet vjedh lavdi në të, beteja të cilës të gjallët nuk ia kanë vlerësuar sa duhet të rënët e saj, beteja ku ka rënë ideologu e ndoshta arkitekti i saj Sali Çekaj i cili është i pari ndër të parët në Kosovë që kur të tjerët pothuaj e kishin harruar lirinë organizoi e drejtoi aksione luftarake guerile kundër Serbisë, ishte i vetmi në betejën e Koshares e në luftën e Kosovës që kishte ushtri të tij ushtri me shokët e tij, kishte grup të vetin luftarak, kishte spartanët e tij”, shprehet Shahu.

Sipas tij, Sali Çekaj ishte politikani më i lartë i Kosovës nga politikanët e atëhershëm që mori pushkën e doli në luftë.

“Ishte një nga kuadrot më të shkolluar të Kosovës që doli në luftë, ishte jurist, gjyqtar, ishte nga të rrallët, ndoshta i vetmi kryetar pushteti, kryetar komiteti rajonal që doli në luftë me pushkë në dorë, ishte ndoshta ndër të vetmit që kushtetutën e Kaçanikut e vuri në zbatim. Ishte artikulues i jashtëzakonshëm, frymëzues. Me gjithë jetën e vdekjen e tij është model frymëzimi por në liri nuk ia keni bërë nderet që i meriton. Ai nuk ra për Kosovën që të merrte ndere. Atij nuk i vyjnë nderet tona, por na vyjnë ne, na japin nder e dinjitet ne. Ai për lirinë tonë e prishi rehatinë, karrierën dhe e dha jetën, s’ka ç’të japë më shumë heroi”, deklaron Shahu.

Rexhep Shahu

Shahu kritikon ashpër si shtetin e Kosovës, ashtu edhe atë të Shqipërisë, të cilët sipas tij, nuk kanë bërë asgjë për ta lartësuar figurën e Sali Çekajt dhe Betejës së Koshares.

“Ne nuk i japim tre metër katror vend për t’i bërë një shtatore nderi në Prishtinë para parlamentit, para kryeministrisë. Nuk ia japim tre metër vend e nuk ia bëjmë një shtatore sa njeriu se duhet ta shohim e të na shohë përditë e na bën me turp. Nuk ia vemë emrin e tij një shkolle, një udhe, një institucioni. Harrojmë ta pohojmë në institucionet e sallat solemne se ai ishte drejtuesi, ai ishte dëgjuesi, ai jepte mend. Na pëlqen ta rrafshojmë me të tjerët por harrojmë ta pohojmë me zë të lartë se ai i udhëhiqte të tjerët, se ishte më trimi, më i qarti, më i kthjellti, më politikani, më shtetari, më organizatori me punë, me pak demagog se të tjerët”, përfundon Rexhep Shahu