Ja sa do të përfitojë financiarisht Carlo Ancelotti si trajner i Brazilit

Pas një sagë të gjatë negociatash dhe pritjeje, tashmë është konfirmuar zyrtarisht: Carlo Ancelotti do të jetë trajneri i ri i kombëtares braziliane. Pas katër vitesh në krye të Real Madridit, tekniku italian është zgjedhja e Federatës Braziliane të Futbollit (CBF) për të udhëhequr “Seleçãon” drejt ëndrrës së titullit të gjashtë botëror.

Ancelotti do ta drejtojë për herë të parë Brazilin më 5 qershor, në sfidën kundër Ekuadorit, në kuadër të kualifikueseve për Kupën e Botës 2026. Me këtë emërim historik, ai bëhet i pari trajner i huaj që merr drejtimin e kombëtares së meshkujve të Brazilit.

Sipas asaj që raporton ESPN, Ancelotti do të përfitojë një pagë mujore prej 770 mijë eurosh, më shumë se dyfishi i asaj që merrnin paraardhësit e tij, Tite dhe Dorival Júnior. Përveç tij, në staf pritet të përfshihen edhe tre ose katër ndihmës, edhe pse ende nuk është e qartë nëse i biri i tij, Davide Ancelotti – aktualisht zëvendës te Real Madridi – do ta shoqërojë në këtë aventurë, pasi për të është përfolur një fillim karriere si trajner i parë.

Ky hap i madh i CBF vjen në një periudhë të trazuar për federatën, me presidentin Ednaldo Rodrigues nën hetim për mashtrim, por pavarësisht polemikave, nënshkrimi i Ancelottit pritet të formalizohet brenda fundit të majit. Brazili po hyn në një epokë të re me një nga emrat më të mëdhenj në historinë e trajningut ndërkombëtar, që ka kaluar në pankinat e Milanit, Chelsea-t, PSG-së, Bayern-it dhe së fundmi te Real Madrid.s.n.