Kaos në Therandë, Peja fiton mes sulmeve nga tifozët

Peja shënoi fitore në përballjen e parë çerekfinale në udhëtim ndaj Golden Eagle Yllit me rezultat 71:77 (23:19, 18:29, 19:15, 11:14).

Çereku i parë ishte tërësisht i baraspeshuar deri në fund, kur vendasit për një nuancë ishin më të mirë, për të fituar këtë pjesë 23:19.

Skuadra pejane u rikthye fuqishëm në periudhën e dytë për të përmbysur shifrat dhe për të shkuar në pushim me rezultat 41:48.

Duhet theksuar se ndeshja, e cila u zhvillua në Therandë, u ndërpre për rreth një orë pas hedhjes së sendeve në parket nga ana e tifozëve vendas, duke detyruar gjyqtarët ta ndërpresin lojën për arsye sigurie..

Kaosi nuk përfundoi me kaq. Gjatë rrugës për në dhomat e zhveshjes, basketbollistët e Pejës u sulmuan nga disa tifozë të Yllit, duke tensionuar edhe më tej atmosferën e ndeshjes.

Pjesa e dytë ishte shumë e luftuar nga të dy skuadrat deri në fund. Lufta ishte e madhe, ku në fund mysafirët ishin më të përqendruar për të fituar 71:77.

Më i miri te vendasit ishte Lis Shoshi me 15 pikë e 14 kërcime, kurse te mysafirët u dallua Benas Griciunas me 17 pikë e 12 kërcime.

Ndeshja e dytë zhvillohet të dielën në Pejë, ndërsa skuadra që shënon dy fitore kualifikohet në gjysmëfinale.