Konflikti me Rusinë, Europa “blindon” Detin e Zi

Bashkimi Evropian zbuloi një strategji të re për të forcuar sigurinë dhe stabilitetin në rajonin e Detit të Zi.

“Kjo strategji synon të nxisë  raportet duke lidhur Evropën me Kaukazin Jugor, Azinë Qendrore dhe më gjerë”, thuhet në deklaratën zyrtare të Unionit.

Blloku planifikon të thellojë bashkëpunimin me Ukrainën, Moldavinë, Gjeorgjinë, Turqinë, Armeninë dhe Azerbajxhanin, ndërsa avancon projektet rajonale të përqendruara në lidhshmëri. Duke folur në një konferencë për mediat, shefja e Politikës së Jashtme të BE-së, Kaja Kallas, komentoi gjithashtu mbi një “qendër sigurie detare të Detit të Zi”.

“Kjo qendër do të jetë sistemi i paralajmërimit të hershëm i Evropës në Detin e Zi. Do të rrisë ndërgjegjësimin për situatën dhe do të ndihmojë në mbrojtjen e infrastrukturës kritike, si instalimet në det të hapur dhe kabllot nënujore”, tha Kallas.

Ajo vuri në dukje potencialin e qendrës për të ndihmuar në monitorimin e përpjekjeve të paqes midis Rusisë dhe Ukrainës dhe theksoi se BE do të rrisë operacionet e çminimit në zonë. Kallas gjithashtu nënvizoi rëndësinë e përmirësimit të “lëvizshmërisë ushtarake” duke përmirësuar portet, hekurudhat dhe rrugët rajonale për transportimin e pajisjeve të rënda ushtarake. “Shpërndarja më e shpejtë e pajisjeve në rajon forcon parandalimin dhe gjithashtu mbështet NATO-n. Krahas përmirësimeve, ne duam një kontroll më të mirë të pronarëve të huaj në porte dhe objekte kyçe”, tha Kallas. Duke përsëritur “rëndësinë e madhe strategjike” të Detit të Zi, Kallas vuri në dukje rolin kritik të rajonit në lidhjen e Azisë Qendrore dhe Evropës, si dhe rëndësinë e tij për sigurinë, tregtinë dhe energjinë.

“Ndjesia e ndryshimit gjeopolitik është aty. Ukraina dhe Moldavia po lëvizin drejt anëtarësimit në BE, edhe Gjeorgjia, nëse kthehet në rrugën e BE-së. Turqia është një partnere jetësore dhe një vend kandidat. Por potenciali i rajonit është dëmtuar nga lufta e Rusisë. Shkeljet e përsëritura të hapësirës ajrore dhe sulmet ndaj porteve dhe korridoreve të transportit detar e nxjerrin në pah këtë realitet”, shtoi ajo, shkruan euronews.al.Diplomatja nënvizoi se BE synon të rrisë bashkëpunimin për të luftuar sulmet kibernetike, dezinformimin dhe veprime të tjera armiqësore, duke e quajtur rajonin e Detit të Zi një “objektiv kryesor” për kërcënimet hibride.