Kriza në Kuvend: Loja e numrave dhe ‘frika’ nga zgjedhjet – kush po fiton nga zvarritja?

Pasi kishte shpresë se Kuvendi më në fund u zhbllokua pas zgjedhjes së kryetarit të ri, Dimal Basha, gjërat morën kahje tjetër.

Kjo për shkak se u shfaq një bllokadë e re, ajo e zgjedhjes së nënkryetarit nga komuniteti serb.

Për shkak të refuzimit të Listës Serbe për të zëvendësuar kandidatin Sllavko Simiq për nënkryetar, kryeparlamentari i sapozgjedhur i hodhi në votim kandidatët e tjerë përmes shortit, përfshirë edhe emrin e Nenad Rashiqit, kryetarit të partisë serbe për Liri, Drejtësi dhe Mbijetesë.

As Rashiq nuk mori vota të mjaftueshme gjatë votimit, ashtu si edhe deputetët e tjerë të Listës Serbe.

Kujtojmë se, do t’i hapte rrugë formimit të Qeverisë së re, pas një ngërçi të gjatë politik, pas zgjedhjeve të 9 shkurtit.

Mirëpo, duket se partitë politike po iu frikësohen zgjedhjeve të reja dhe duke mos i pasur asnjëra numrat për formim të qeverisë, po e mbajnë Kuvendin peng.

Preqi: Ngecja edhe pas ngecjeve

Mirëpo, për opinionistin Dedë Preqi, Kosova po futet në një krizë të re, pas zgjedhjes së Dimal Bashës kryeparlamentar.

Dedë Preqi

Ai në bashkëbisedimin e tij me “Bota sot” foli mbi bllokadën e re të krijuar, për zgjedhjen e nënkryetarit serb.

“Në seancën e mbajtur me 26 gusht të këtij viti, deputetët e Kuvendit të Kosovës, zgjedhën deputetin Dimal Basha, si kryeparlamentar të Kuvendit, duke e zhbllokuar deri më tani rrugën e konstituimit të këtij Kuvendi.

Mirëpo, a, mund ta quajmë edhe këtë rast një ngecje pas ngecjeve të deritanishme të konstituimit të Kuvendit të Kosovës, edhe pas zgjedhjes të kryetarit të Kuvendit dhe tre nënkryetarëve të tjerë të subjekteve të mëdha shqiptare dhe një prej pakicës jo serbe, por dështon zgjedhja e nënkryetarit nga pakica serbe, duke e shkakëtuar edhe një lloj ngërçi të vogël.

Pakica serbe nga Lista serbe, propozon me këmbëngulje kandidatin Igor Simiç, dhe 8-të, të tjerë, prej të cilëve gjenden në listën e kandidimit, vetë serbët e kësaj liste nuk e japin asnjë votë për këta kandidat, ndërsa Simiçi e humb garën në rundin e tretë me vota të pamjaftueshme, i cili sipas ligjit kushtetues nuk ka të drejtë tjetër propozimi”.

E për këtë, Preqi u treguar kritik me partitë politike dhe qasjen e tyre ndaj këtyre zhvillimeve të fundit, duke mos votuar Rashiqin për nënkryetar Kuvendi.

Ai tha se edhe kjo bllokadë e re do marrë shumë kohë dhe kësisoj do vonohet edhe më tej konstituimi i Kuvendit.

“Sigurisht se disa subjekte politike, sikur nuk kanë vullnet t’i përmbushin obligimet e tyre për të vepruar në harmoni me njëri-tjetrin dhe me ligjet që parasheh Kushtetuta e vendit, siç po dallohet LDK, e cila po sillet dhe mbështjellët rreth e rrotull, duke mos dhënë asnjë rrugëzgjidhje, edhe ndaj përgjegjësive që kanë.

Ndërsa PDK, dhe AAK-NISMA, herë qojnë drejtë nevojës së pranueshme e herë bëhen pishman, pikërisht në çastin e shpërthimit të ngadhënjimit, kur e votojnë kryeparlamentarin Basha, çka do të thotë më pastaj, format e sjelljeve të tyre ndaj këtij personi, janë shumë të egra dhe fyese që depërtojnë thellë, duke e rënduar vetë qenjën tonë njerëzore.

Mund të ndodh që edhe pas zgjedhjes të kryetarit të Kuvendit dhe nënkryetarëve të tjerë, mos zgjedhja e një nënkryetari nga pakica serbe, përsëri do të kemi edhe një bllokadë të re, e cila do të merr kohë, sepse Lista serbe, tani më do të merret me të drejtat e veta absurd”, nënvizoi ai.

Në të kundërtën, ngriti dyshime se pas kësaj bllokade fshihen të gjitha partitë, pasi në mungesë të numrave për qeveri, u frikësohen zgjedhjeve të reja.

“Duke ditur se kush është Lista serbe, e cila deri më tani as që është distancuar nga politika e Vuçiqit dhe nuk është distancuar as nga sulmet e terroristave të Banjskës, që e udhëheqi nënkryetari i saj dhe kryeterroristi Milan Radoiçiq.

Prandaj, deputetët e Kuvendit të Kosovës, e kanë në duart e veta zhbllokimin e kësaj situate, duke e zgjedhur kandidatin e komunitetit serb Nenad Rashiq, si nënkryetar të Kuvendit, që të përmbyllet një kapitull shumë i rëndësishëm.

Një bllokadë e tillë mund të jetë edhe ndonjë projekt i partive opozitare, apo edhe vetë partisë së madhe në këtë rast LVV, përshkak se, në mungesë të numrave për të formuar qeverinë e re, mund të blihet kohë, sepse duhet të bëhen zgjedhjet e reja, të cilat do të ishin barometri i gjithë kësaj katrahure dhe mjegullire, që është krijuar deri më tani, duke e zhgënjyer qytetarin e këtij vendi, i cili ka material të bollshëm për të ndëshkuar fajtorët dhe mëkatarët e merituar”, përfundoi Dedë Preqi për “Bota sot”.

Halimi: Albin Kurti duhet të arrijë një marrëveshje politike me partinë Nisma e Fatmir Limajt

Kurse, për këtë temë, për “Bota sot” foli edhe njohësi i çështjeve politike, Jeton Halimi.

Jeton Halimi.

Së pari, ai komentoi zgjedhjen e Bashës si kryeparlamentar dhe ngecjen tek zgjedhja e nënkryetarit të minoritetit serb.

“Pas zgjedhjes së Kryeparlamentarit z. Dimal Basha, Kuvendi nuk u konstituua plotësisht dhe nuk u zgjodhën edhe nënkryetarët nga të gjitha komunitetet joshumicë, sidomos nga minoriteti serb. Insistimi për të mos votuar në pako kishte tendenca për bllokimin e Kuvendit të Kosovës.

Kjo ka lënë një boshllëk të madh dhe ka nxitur interpretime të shumta në aspektin kushtetues. Besoj se minoriteti serb, përkatësisht Lista Serbe, do ta dërgojë çështjen në Gjykatën Kushtetuese për interpretim, në lidhje me votimin e kandidatit të tyre, Sllavko Simiq”.

Sipas Halimit, Kosova nuk ka nevojë për blloakda të reja dhe as për zgjedhje të reja.

Sipas tij, LVV nuk i ka numrat për ta formuar qeverinë, për këtë edhe po e zvarrit procesin.

“Situata të tilla nuk i duhen Kosovës, ndërsa kësaj situate i gëzohet z. Kurti, i cili e di shumë mirë se nuk i ka votat për të formuar qeverinë. Ai krijon mjegull në opinion dhe paraqitet si viktimë, për të arritur qëllimet partiake e politike. Në fund, kjo do t’i kushtojë me vota gjatë fushatës për zgjedhjet komunale që do të mbahen më 12 tetor.

Pakënaqësitë tashmë kanë dalë edhe nga radhët e Vetëvendosjes. Ishte shumë e qartë se dorëheqja e z. Liburn Aliut nga pozita e ministrit në detyrë erdhi pikërisht si pasojë e politikave të gabuara të Albin Kurtit në raport me qytetarët e Kosovës”, konsideroi ai.

Në fund, analisti shtoi se Kurti duhet të bëj marrëveshje me Limajn dhe ta formojë qeverinë, pasi zgjedhjet nuk janë opsion i duhur.

“Nuk mendoj se shteti e ka komoditetin për të shkuar në zgjedhje të reja. Bllokada do të vazhdojë dhe institucionet nuk do të mund të themelohen para së paku një muaji tjetër.

Albin Kurti duhet të arrijë një marrëveshje politike me partinë Nisma e Fatmir Limajt, për të siguruar numrat e nevojshëm – 61 vota – për formimin e qeverisë, e më pas për zgjedhjen e Presidentit/Presidentes. Në mënyrë hipotetike, njëra nga partitë e mëdha të opozitës mund të bëhet pjesë e bashkëqeverisjes dhe të kontribuojë në zgjedhjen e Presidentit/Presidentes, duke shmangur kështu zgjedhjet e reja”, përmbylli Jeton Halimi