Kryeministri Kurti merr pjesë në pritjen mbretërore të Mbretit Charles III në Londër

Kryeministri në detyrë i Republikës së Kosovës, Albin Kurti, mori pjesë në pritjen mbretërore të organizuar nga Madhëria e Tij, Mbreti i Mbretërisë së Bashkuar Charles III, me rastin e zhvillimit të Samitit të Procesit të Berlinit në Londër, transmeton Kosova Post.

Pritja u mbajt në Pallatin Buckingham, ku përfaqësues të vendeve të Ballkanit Perëndimor dhe të Bashkimit Evropian u mblodhën për të diskutuar mbi bashkëpunimin rajonal, integrimin evropian dhe zhvillimin ekonomik të rajonit.

Në fjalën e tij, Kryeministri Kurti theksoi rëndësinë e bashkëpunimit ndërmjet vendeve të rajonit dhe të mbështetjes së Mbretërisë së Bashkuar në përpjekjet për stabilitet dhe prosperitet në Ballkanin Perëndimor.

“Pjesëmarrja e Kosovës në këtë samit dhe mikpritja e Mbretit Charles III janë dëshmi e marrëdhënieve të forta ndërmjet Kosovës dhe Mbretërisë së Bashkuar, si dhe e përkushtimit tonë të përbashkët për paqe dhe zhvillim në Evropë,” tha Kurti.

Samiti i Procesit të Berlinit, i cili po zhvillohet në Londër këtë javë, mbledh udhëheqësit e vendeve të rajonit dhe partnerët evropianë për të forcuar dialogun politik, ekonomik dhe social në Ballkanin Perëndimor.