Kthimi i autobusëve nga Prishtina për në Podujevë do të bëhet nga Xhamia e Llapit

Nga e hëna, kthimi nga Prishtina për në Podujevë do të bëhet nga Xhamia e Llapit, siç ishte më parë.

Njoftimi u bë nga Shoqata e Transportit të Autobusëve Prishtinë – Podujevë. Siç thuhet në njoftim, arsye për këtë është mungesa e një stacioni të përshtatshëm.

“Shoqata e Transportit të Autobusëve Prishtinë – Podujevë njofton të gjithë udhëtarët se, duke filluar nga dita e hënë, kthimi nga Prishtina për në Podujevë do të bëhet nga Xhamia e Llapit, ashtu siç ka qenë edhe më parë. Ky ndryshim është i domosdoshëm, sepse mungesa e një stacioni të përshtatshëm rrezikon sigurinë e nxënësve të shkollave, të qytetarëve të Llapit, si dhe të gjithë udhëtarëve që udhëtojnë në relacionin Prishtinë – Podujevë. Po ashtu, ju njoftojmë se përderisa orarin e kemi nga Xhamia e Llapit, ligji është në anën tonë dhe na mbron në këtë vendim.”

“Përveç kësaj, në këtë stacion përfshihen edhe udhëtarët e fshatrave Orllan, Shajkoc dhe Majac, ku ndalesa do të bëhet po ashtu te Xhamia e Llapit, siç ka qenë edhe më herët.”