Kurti: Jusuf Gërvalla figurë unike e kulturës dhe politikës shqiptare

Kryeministri në detyrë, Albin Kurti, ka kujtuar sot patriotin, artistin dhe aktivistin politik, Jusuf Gërvallën, në 80-vjetorin e lindjes së tij.

“Jusuf Gërvalla, një nga personalitetet më të rëndësishme në historinë politike të Kosovës, u lind më 1 tetor 1945 në fshatin Dubovik të Deçanit. Sikur jeta e tij të mos ndërpritej dhunshëm nga atentati politik i organizuar nga shteti i Serbisë më 17 janar 1982 në Gjermani, sot ai do të mbushte 80 vjet”, ka shkruar Kurti.

“Jusufi formësoi një profil të rrallë, duke qenë gazetar, poet, shkrimtar, këngëtar dhe aktivist politik, një figurë unike në historinë e inteligjiencës kulturore dhe të artistëve të angazhuar politikisht në Kosovë. Këngët dhe poezitë e tij kanë mbijetuar kohërave, ashtu si shembulli i tij i përkushtimit për çështjen kombëtare dhe thellësisë në mendim politik”, tha ai.