Laert Vasili viziton varrezat e Jasharajve: Lavdi komandantit legjendar Adem Jashari dhe gjithë dëshmorëve të lirisë

Ish-banori i Big Brother VIP Albania 4, aktori i njohur Laert Vasili, ka zhvilluar një vizitë në Kompleksin Memorial të Jasharajve në Prekaz, një vend që për shqiptarët kudo është simbol i qëndresës, sakrificës dhe lirisë.

Vizita e tij u bë publike përmes një videoje të shpërndarë në rrjetin social TikTok, ku Vasili shihet i ulur në gjunjë përpara varrit të komandantit legjendar Adem Jashari – një gjest përulësie dhe respekti të thellë ndaj figurës më të lartë të rezistencës shqiptare në Kosovë.

“Lavdi komandantit legjendar Adem Jashari dhe gjithë dëshmorëve të lirisë”, ka shkruar aktori në përshkrimin e videos.

Laerti, me gjestin e tij, solli në vëmendje rëndësinë që duhet t’i kushtohet kujtesës historike, jo vetëm në përvjetorë apo raste zyrtare, por edhe në jetën e përditshme, përmes akteve simbolike.

Ky veprim i ish-konkurrentit vjen si një kujtesë se nderimi për figurat kombëtare nuk njeh kufij, profesione apo përkatësi të momentit. Përulja e tij përpara varrit të një heroi është një akt që i flet ndërgjegjes shqiptare, duke na kujtuar se liria nuk është dhuratë, por amanet që duhet ruajtur me dinjitet.